INgcobo iphethe inkwenkwezi yebhola ekhatywayo!

Iqela lebhola ekhatywayo lamanenekazi, iEluhewini Ladies, lijonge ukuvelisa iinkwenkwezi zabadlali abatsha abakwizinga eliphezulu eminyakeni ezayo.

Eli qela laseNgcobo lidlala kwi-Inland Sasol League elifince kuyo isizini egqithileyo lihleli kwindawo yesihlanu.

Omnye wabadlali abaphuma kwiEluhewini Ladies owenza iziqwenga kwibhola ekhatywayo yintwazana ekuthiwa nguOyisa Marhasi oneminyaka elishumi elinesixhenxe kuphela.

UMarhasi wazibalula kunyaka ophelileyo emva kokunikwa ithuba lokudlala nguSiphiwe Dludlu oqeqesha iqela lesizwe lamantombazana aneminyaka elishumi elinethoba.

UDludlu wamkhetha lo mdlali ngenxa yesakhono sakhe sokufaka amagowuli ngethuba iqela lakhe lidlala imidlalo yeCOSAFA awafaka kuyo amagowuli alishumi kunyaka ophelileyo, emva kokumbona eThekwini kwitumente yezikolo.

UMarhasi ufunda uGrade 10 kwisikolo saseNgcobo, iNyanga High School. UDumisani Gcina, oqeqesha iEluhewini Ladies, uthi unomnqweno wokubona umdlali wakhe edlalela aBanyana Banyana kulo nyaka.

“Kwisizini ephelileyo, uMarhasi ufake amagowuli alishumi elinesihlanu eyedwa kwiSasol League,” utshilo uGcina ethetha nentatheli yeli phephandaba.

Kwinyanga ephelileyo, uMarhasi ufumene elinye ithuba lokumela iMpuma Koloni kwenye itumente equka amaqela aphuma kumaphondo onke.

Omnye umdlali ozibonakalisileyo ibe nguZusiphe Goniwe (16) odlalela iqela laseNgcobo.

UMarhasi uncede iqela leMpuma Koloni ngamagowuli amathathu ukuze libuye nodumo.

UGcina uthe intwazana yakhe ingumzekelo omhle kwabanye abantwana abasakhulayo futhi iqhuba kakuhle kakhulu. Kangangokuba uthi baninzi abantwana abadlala ibhola ekhatywayo ngoku kuba befuna ukulandela ekhondweni likaMarhasi.

Ngoku umqeqeshi wakhe uthi uzimisele ukusebenza ngokukhulu ukukhuthala ukuze avelise nabanye abadlali.