INtlaza Lions ifungele iSwallows emdlalweni weRugby Super 14

Noxa isiqalo sayo iEastern Cape Rugby Super 14 sibe namagingxigingxi – kodwa yonke into ihamba kakuhle ngoku. Emva kwemidlalo emine nemihlanu yamanye amaqela, sekucaca ngoku ukuba umcimbi ubheka ngaphi ngoba ayahluzana. Nakubeni iintshatsheli ezikhuselayo zibethiwe, iProgress, ziqale mva – kodwa zifuthela emagxeni kwiKruisfontein United ehleli kwindawo yokuqala kuGroup A. Kanti yena uGroup B ukhokelwa yiEL Police eyiphumelele yomihlanu imidlalo yayo.

Njengokuba isigaba sokuqala sisongwa, amaqela amaninzi aqokelele amanqaku abalulekileyo kwiveki ephelileyo. Iziphumo: iNcerha Leopards ibethwe yi’Old Selbornians ngo’16-10, iGardens ibethwe iPark ngo’19-14, iKruisfontein ibethe iProgress ngo’26-21 emdlalweni obalulekileyo, iCrusaders izibethele iSwallows ngo’33-6, iPolice ibethe iKirkwood ngo’15-6, iJefreys ibethe iNtlaza Lions ngo’17-15 yaze iPE Harlequins yabetha iYoung Leopards ngo’18-10.

Kwiindawo zokuqala kuhleli iKruisfontein (Group A) nePolice (Group B). Amaqela aza kulwela amanqaku kwakhona ngempelavi, ngakumbi lawo abethiweyo kwiveki ephelileyo. Elinye lamaqela elizimisele ukuphumelela yiNtlaza ebethwe emidlalweni emithathu kwemine eyidlalileyo kwiSuper 14 yayo yokuqala. Iqela laseMampondweni linabadlali abaphambili abonzakeleyo – kodwa lithi liza kulwela ukuguqula izinto ngoMgqibelo xa lindwendwela iSwallows emdlalweni oza kube useMdantsane.

“Akukho mnandi ukubethwa – kodwa ke asikhalazi ngoba sidlala namaqela anezinto thina sizisukela ezilalini aapho kungekho kwa nto,” utshilo uLucas Mngwevu. “Sicinga ukuba sinalo ithuba lokuya phambili ukuba singabetha iSwallows ngoba nayo ayiqhubi kakuhle. Sisenalo ithemba noxa sibethwa kukonzakala kwabadlali. Emdlalweni ogqithileyo sibethwe nje ziimpazamo ezincinci nobumanzi bebala – kodwa siza kuzama ukulwa kule veki,” utshilo uMngwevu. Yonke imidlalo iza kuqala ngentsimbi yesithathu ngoMgqibelo.

Imidlalo yeSuper 14:

Jefreys Bay vs PE Harlequins; Young Leopards vs Kirwood; Swallows vs Ntlaza; East London Police vs George Crusaders; Ncerha Leopards vs Moonlight; Gardens vs East Rand United; Old Selbernians vs Kruisfontein; Park vs Progress.