Amaqela ebhola ekhatywayo amanenekazi ayiqale ngendlela encumisayo isizini yeHollywoodbets Super League kulo nyaka. Kwimidlalo yokuvula yokuqala, amaqela afake amagowuli aphaya kumashumi amathathu onke. Phakathi kwamaqela aqale isizini ngendlela encumisayo liqela laseGcuwa ekuthiwa yiThunderbirds Ladies. Iphondo leMpuma Koloni libabalwe ngamaqela amabini kule isizini, iThunderbird neCity Lads yaseGqeberha. Ukuqhuba kakuhle kweThunderbirds ziindaba ezimnandi ebholeni yamanenekazi eMzantsi Afrika ngoba iqinisa ukhuphiswano phakathi kwamaqela adlala kwiHollywoodbet Super League. Akothusi kekambe oku ngoba ngunyaka wesibini lo idlala kwinqanaba eliphezulu. Iyiphumelele yonke imidlalo emithathu eyidlale kule sizini.
Ithe ngcu kwindawo yesithathu kwiSuper League emva kokuqokelela amanqaku alithoba. Entla kweThunderbirds kuhleli iMamelodi Sundowns elandelwa JVW FC eziyiphumelele yonke imidlalo yazo kule isizini. Kwiveki ephelileyo, amaqela waseMpuma Koloni akhuphisana kwiHollywoodbets Super League ebedibene emdlalweni obuseGqeberha. Ngethamsanqa layo iThunderbirds ibuye imisila iphezulu emva kokubetha iCity Lads ngamagowuli amabini eqandeni. Ukuba izinto ziyihambele kakuhle iThunderbirds emdlalweni waphakathi evekini, iza kudibana neTUT Football Club inamandla ngakumbi emdlalweni weHollywoodbets Super League ekulindeleke unike umdla kakhulu ePitoli ngentsimbi yesithathu emalanga ngeCawe.
Kunyanzelekile iqela laseGcuwa liqokelele amanqaku kwangoku kusaqala isizini ngoba umhlaba uye uthande ukwenyuka kakhulu xa kuyiwa kwisigaba sesibini sesizini. Elinye iqela laseMpuma Koloni, iCity Lads, iza kundwendwela iJVW FC emdlalweni osemalanga ngeCawe. iDurban Ladie FC yamkela iFirst Touch FC, iBloem Celtic FC idibana neTsunami Queens, iJoburg University idlala neRichmond United, iMamelodi Sundowns indwendwela iWestern Cape University, iVasco Da Gama igxeleshe iMa-Indies Ladie FCize iCoal City Wizards idibane neGolden Ladies. Yonke imidlalo iza kudlalwa ngeCawe.
Liyoyikisa izinga lokunyamalala kwamadoda eGqeberha!