Yenze omnye umtsi oya phambili i’Orlando Pirates emva kokuba izuze amanqaku amathathu abalulekileyo. Oku kwenzeke emva kokuba iPirates ibethe iRichards Bay ngamagowuli amabini eqandeni emdlalweni weDStv Premiership obumhle eKing Zwelithini Stadium ngenjikalanga yanamhlanje. Amagowuli ephumelele ngawo iPirates afakwe ngabadlali abayinkathazo ababini, uTerrence Dzvukamanja noMonnapule Saleng. EzikaMagebhula ngoku ziphumelele imidlalo emithathu ilandelelana kwilinge lazo zokufumana indawo yesibini kwiDStv Premiership.
Inkqonkqoze kuqala iPirates, ezicacisileyo into eyifunayo kwangoko, ngebhola kaDzvukamanja ebanjwe nguMalcom Jacobs ezipalini. Emva kwemizuzu embalwa, uJacobs weRichards Bay wenze umsebenzi omhle ngethuba ethintela ibhola ebikhatywe ngobuchule nguSaleng kude kufuphi nomhlaba kanozinti. UDzvukamanja uyibeke endaweni entle iPirates ngegowuli alifake ngentloko emva kokufumana ibhola entle kuKabelo Dlamini kwicala lasekunene kwisigaba sokuqala.
Kuyiwe kwixesha lokuphumla iPirates ihamba phambili ngegowuli elinye futhi iyiyo enamandla emdlalweni. Bekunyanzelekile umqeqeshi weRichards Bay enze inguqu ekuqaleni kwesigaba sesibini ngoba iqela lakhe alisidlalanga kakuhle isigaba sokuqala. UVasili Manousakis wenze njalo ngokwenene. Umqeqeshi ukhuphe uSibonginhlanhla Mthethwa, indawo yakhe ethathwe nguNdiviwe Mdabuka. Iqela likaJose Riveiro liqhubele phambili nokulawula umdlalo lidala namathuba emdlalweni.
UThembinkosi Lorch uphose elinye ithuba ejongene noMalcom Jacobs ezipalini. UYanela Mbuthuma uzamile ukuhlasela kwicala lasekunxele ebelibanjwe ngu-Innocent Maela – kodwa akalifumananga igowuli. Emizuzwini yokugqibela, kwixesha elongezwe ngusompempe, uSaleng uphose ithuba lokufumana igowuli lesibini. ULorch, onethutyana ebuya ekonzakaleni, uchongwe njengomdlali oqaqambileyo emdlalweni wanamhlanje eKing Zwelithini Stadium. Ukuba iSuperSport United ibethiwe yiChippa United emdlalweni wanamhlanje, iPirates iza kuhlala kwindawo yesibini.
Kubanjwe abathathu ngezityholo zokuxhwila nokuqweqwedisa