Iqela laseMqanduli lomnyazi ligoduke lixhakazela emva kwetumente ebibanjelwe eXhorha ngempelaveki egqithileyo. Emva kokugqugqisa kwitumente ekuthiwa yi-Imiganu Easter Tournament, iPitBulls Netball Club iphakamise indebe ekhatshwe ziimbasa emva kokubetha iMadala Madala ngamagowuli angamashumi amabini anesihlanu kwalishumi elinesibhozo emdlalweni womnyazi wokugqibela. Itumente ibiququzelelwe ngoomasipala ababini: Amathole Municipality noMbhashe Municipality. Kuye kwanyanzeleka ingabanjwa ngeentsuku zePasika njengeminye iminyaka ngenxa yemvula ebikade isina ingayeki.
Amaqela amaninzi athathe inxaxheba kwisiqendu setumente yalo unyaka aphume kwiilali zaseXhorha nakwiindawo ezifana noMqanduli. Njengokuba bekukho imidlalo yebhola ekhatywayo neyomnyazi, kuthiwa umgangatho ubuxhomile njengakweminye iminyaka kwaye nabaququzeleli bonwabile yindlela eziqhutywe ngayo izinto. Amakhulu abalandeli bezemidlalo abebezimase bamke bonelisekile. Iqela eligoduke nempumelelo emidlalweni yebhola ekhatywayo ibe yiDova Dova yaseXhorha ebethe iReal Brothers ngamagowuli amathathu kwelinye emdlalweni wamagqibelakankqoyi. Omabini amaqela aphumeleleyo agoduke asindwa ngamabhaso. Elitshatshele emdlalweni womnyazi, iPitbulls efumene indebe, iimbasa, izikupha ezitsha zokudlala nemali eyiR2 500.
Kanti yona iDova Dova igoduke nendebe, iimbasa, izikipha ezitsha nemali eyiR5 000. Ethetha neli phephandaba, uMnu. Melinkqubo Ndabokutya, ekuqaleni kwale veki uthe: “Sonwabe kakhulu ngoba itumente ibinkulu ngaphezulu kokuba beiyilindele thina. Kube kuhle kuthi ukubona abantu bencumile bonwabele imidlalo emva kokuphazanyiswa yiKhorona ixesha elide. Kodwa okusonwabise kakhulu kukubona amaqela abenxanelwe impumelelo emabalaeni. Nangona izinto zihambe kakuhle, ndifuna ukuthi sicela inkxaso koosomashishini. Sicela batyale imali yabo kwiinkqubo zophuhliso ezifana nale yethu.”
iSundowns ingombe iSibanye emdlalweni obutaka iintlantsi eLoftus Stadium!