Umqeqeshi wePlatinum Stars, uCavin Johnson, ngomnye wamadoda ahlonitshwayo ebholeni ekhatywayo eMzantsi Afrika, ngenxa yomsebenzi omhle awenze kweli qela laseMntla Ntshona, nangona engekayiphumeleli indebe yePremier League – neyeyona nto ibalulekileyo.
IPlatinum Stars yenze umsebenzi omhle kwisizini edlulileyo ngokuthi ifumane indawo yesithathu kwisizini yePSL ka’2015/16, ngaphandle kwabadlali abanamagama amakhulu. Lo nto iyodwa nje ibhence isakhono sikaJohnson sokuqeqesha okanye sokusebenza nokuba yintoni na ekhoyo phambi kwakhe.
Njengokuba kusondela isizini entsha yePSL, uJohnson, ubhengeze abadlali abatsha azimisele ukusebenza nabo. Abadlali nguHenrico Botes, Steven Hoffman, Katlego Khunou, Tshirelatso Lesabane, Sipho Senne, Sphamandla Mlilo, Sphiwe Mnguni, Nhlakanipho Duma, Gift Links, Kamohelo Mathe, Thuto Mphahlele, Thobani Kunene noBenson Shilongo. Ebuzwa ngokulindelekileyo kuye kwisizini ezayo, uCavin, uthe abaphathi bakhe bafuna iPlatinum Stars ingaphumi kumaqela amathandathu aphambili. Ngumsebenzi onzima lowo – kodwa uJohnson ukwazile ukuwenza kwisizini ephelileyo. “Kwisizini edlulileyo sasifuna indawo yesihlanu. Kwisizini ezintathu ezidlulileyo saphosa indebe yePSL ngamanqaku amathathu qha.
Xa sidibanisa ezonkcukacha njengokuba sisondela kwisizini entsha, lo nto ithetha ukuthi siliqela elenza umsebenzi omhle,” utsho uJohnson.
Lo mqeqeshi uchithe ishumi lonke labadlali abadala, waze wanyusela abadlali abaselula. Lo nto yenza iPlatinum ibe lelinye lamaqela anabadlali abaselula kwiPSL.
“Ukunyusela abadlali abatsha yinto esifuna ukuphucula ngayo iqela lethu – kodwa sizimisele ukulwela indawo kumaqela asibhozo aphambili,” utshilo uJohnson.
Umphathi weStars, uSenzo Mazingisa, uthe nangona kukho amaqela amakhulu eMzantsi Afrika akhuphisana neqela lakhe – kodwa bafuna iPlatinum Stars ihlale kwindawo yesithandathu xa kuphela isizini. Eli qela liza kudlala kwiCaf Confederation Cup kunyaka ozayo.
IZIMVO | Ngumbutho waseKZN iMK Party