Abatshakazi bePSL, iRoyal AM, ibhalise impumelelo yayo yokuqala namhlanje ngokubetha iChippa United emdlalweni weDStv Premiership obubanjelwe eChatsworth Stadium ngenjikalanga yanamhlanje. Isiqalo seqela likaMamkhize kwisizini entsha khange sibe sihle kwaphela emva kokubethwa emidlalweni yokuqala emibini yokuvula. Ibisoloko ihleli emsileni, ngoku zijikile izinto – emsileni kuhleli AmaZulu neMarumo Gallants emva kokubetha iChippa United ngo’1-0. Umdlalo ubusemgangathweni ophezulu. Iqela likaMamkhize lihlasele zisuka kwanyanzeleka abadlali beChippa banqande amanzi engena endlini zisuka emdlalweni. Unozinti weChippa, u-Ismail Watenga, uvale ibhola embi kaNdumiso Mabena nenye ebigotywe ekunxele. Ngamathuba lawo amahle adalwe yiRoyal AM ebekumele ukuba ihambe phambili ngawo ukuba ibikwazile ukuwasebenzisa kakuhle.
Emva kokuya kwixesha lokuphumla iyinkwa nenkwa, iRoyal AM ibuye yafaka igowuli kwisigaba sesibini yakugqiba yavala ucango. UVictor Letsoalo ufake ipenela emva kwebhola ebanjwe ngesandla nguRiaan Hanamub emhlabeni kanozinti. Ukufakwa kwabadlali abafana noPhakamani Mahlambi, uPeter Maloisane no-Athini Jodwana akyiyincedanga iChippa United ebiqala ukubethwa kule isizini phantsi komqeqeshi omtsha, uGavin Hunt. Kweminye imidlalo: iBaroka ibethwe ngo’1-0 yiMaritzburg United, iSekhukhune ibambene ngo’1-1 neStellenbosch, iPirates ibethe iSwallows ngo’1-0 yona iTS Galaxy ibambene ngo’2-2 neGolden Arrows. Emdlalweni oqhubekayo ngoku, iMamelodi Sundowns isahamba phambili ngegowuli elinye kwiKaizer Chiefs esankonye iqanda eLoftus Stadium.
Royal AM: Nyame, Mkhize, Monamodi, Rikhotso, Lingwati, Mashikinya, Manganyi, Potsane, Mabena, Mahlasela, Letsoalo.
Amalalela: Chaine, Masuku, Mabuza, Mashiane, Sera, Van der Goss, Mdluli, Matjila, Phalane.
Chippa United: Watenga, Mdunyelwa, Hanamub, Pietersen, Zulu, Seabi, Mokhele, Mdlinzo, Ngele, Lebitso, Eva Nga.
Amalalela: Mtshali, Jodwana, Mahlambi, Maloisane, Matrose, Mkhize, Lentjies, Haukongo, Mthethwa.
Lusindiso Ndabakayise uthi iMighty Eagles iza kudlalela ukuwawisa AmaZulu!