Isecicini lokwenza imbali iSuperSport United

Emva kokuba iMamelodi Sundowns iphumelele iCaf Champions League okokuqala kunyaka ophelileyo – ngoku yiSuperSport United esecicini lokuzenzela imbali kwibhola ye-Afrika.

Oku kwenzeka emva kokuba Amatsatsantsa efikilele kumdlalo wokugqibela weCaf Confederation Cup emva kokubetha iClub African ngo’3-1 enkundleni yayo ngokuhlwa kwangeCawe edlulileyo.

Eli qela lika-Eric Tinkler libuye umdlalo emva kokubambana ngo’1-1 kumdlalo wokuqala.

Eli qela lasePitoli lifumana ithuba lokuphumelela indebe ebalulekileyo emva kokuba liphumelele iMTN8 ekhatshwa zizigidi ezisibhozo zerandi (R8-million) kutshanje.

Nangona eli ilithuba lokuqala elicacileyo leSuperSport lokuphumelela indebe ye-Afrika – kodwa lityeli lesithathu kuTinkler ezama. Uzame amatyeli amabini esengumqeqeshi we-Orlando Pirates ngaphandle kwempumelelo. Okokuqala wayelisekela mqeqeshi likaRoger de Sa ngethuba iBucs ibethwa yi-Al Ahly kwiCaf Champions League ngo-2013.

Uphinde wazama engumqeqeshi oyintloko wePirates ngo-2015 kwiConfederation Cup. Izithembile kekambe kweli tyeli le ndedeba eyayifudula idlalela iBafana Bafana. ISuperSport izakuvana amandla neTP Mazembe kumdlalo wamagqibela kankqoyi.

“Sidlale kakuhle kwaye besingaxhamazeli ebholeni. Izigqibo zabadlali bezichanekile kwaye besiyazi into elindelekileyo kubo. Sikhe sadlala iibhola eziphezulu, into enike iClub African ithuba lokuza kuthi – kodwa abadlali bethu badlale kakuhle kwisigaba sesibini. Ndiyazingca ngomsebenzi owenziwe liqela lonke. Indlela esiyihambileyo ukuze sibe lapha inde kwaye isifanele indawo esikuyo,” utshilo uTinkler.

Indlela yeSuperSport yaqala kusekho uStuart Baxter kweli qela – kodwa khange asokole uTinkler ngoba amahlandinyuka okudlala kumazwe e-Afrika uwaqhelile.

Iifolozi zeSuperSport ezimbini uJeremy Brockie noBradley Grobler zizo eziyincedileyo kakhulu kwicala lamagowuli ukusukela ekuqaleni ukuzothi ga kwisigaba sokugqibela seConfederation Cup.