Izinto ziyihambele kakubi kakhulu i-Orlando Pirates emva kokuba iquthiswe kabuhlungu yiSekhukhune United ngamagowuli amabini eqandeni (2-0) emdlalweni weDStv obutak’iintlantsi ePeter Mokaba Stadium ngorhatya lwanamhlanje. Kuthe qabu kamnandi kuKaitano Tembo obenethuba elide engasayifumani impumelelo kwiSekhukhune United afike kuyo phambi kokuqala kwesizini eqhubekayo. Kuyiwe kwixesha lokuphumla iyinkwa nenkwa macala. Umdlalo unike umdla zisuka kwisigaba sokuqala somdlalo ngoba omabini amaqela ebezimisele. Aqale ngokufundana – kodwa ekuhambeni kwexesha, aye aqala ahlaselana.
URichard Ofori ukhe wasebenza emzuzwini wamashumi amabini anesibhozo abethenga ngesandla ngawo ibhola embi ebikhatywe kakuhle nguLinda Mntambo obeyingxaki. Amathuba okubhalisa ebhodini ebekhona wona – kodwa akubangakho qela elizame ngokwaneleyo. Abuyele ebaleni amaqela asukelana kwakhona. Umahluko emdlalweni wanamhlanje ibe kukuxakeka kukaRichard Ofori obenesithukutheni emdlalweni wangempelaveki obuphakathi kwePirates neMamelodi Sundowns. Unozinti wePirates uphinde wavala ibhola ebikhatywe nguMntambo obethande ukuba yinkathazo emdlalweni wanamhlanje.
Ezimnyama zishiyeke ziqhwalela emva kokuba uThabiso Monyane enikwe uphum’ aphele ngekhadi elibomvu emzuzwini wamashumi amathathu ngenxa yokudlala kakubi uVusumuzi Ncube. UJose Riveiro ufake uKermit Erasmus ofike wawufunqula umdlalo. Nangona iPirates ibingaphelelanga – kodwa yena noDeon Hotto bazamile ukudala amathuba. Emva kokudlala kakuhle ibhola, iSekhukhune United ide yalifumana igowuli elifakwe nguElias Mokwena emzuzwini wamashumi asibhozo anesithathu. Iphindile iSekhukhune ngebhola efakwe nguMncube emva kokuba uTim Miguel enikele uRichard Ofori ibhola embi engakwazanga ukuyidlala kakuhle.
UMzantsi Afrika uzuze inqaku kwiCongo Brazzaville ebibhokile kowayo!