Isinde cebeshu ekhaya iFC Buffalo

Amaqela amabini adlala kwi-ABC Motsepe angombene kwanzima kodwa akwabikho elifuna ukoyiswa. IMorning Stars yaseBhayi igoduke incumile emva kokufumana inqaku elinye emva kokudlala ntanganye ngo’2-2 neFC Buffalo kumdlalo weMotsepe League obuseJan Smuts Stadium, eMonti, emva kwemini ngoMgqibelo.

Isiqingatha sokuqala siqale ngezinga eliphantsi futhi kucaca nyhani ukuba kubuywa kwikhefu leKrismesi ngabadlali. Umdlalo wona ubumhle macala omabini – kodwa kubonakala ukuba akukho qela elifuna ukwenza iimpazamo.

Liqela laseBhayi ebelinamandla kwesi sokuqala isiqingatha. Ingxaki nje yalo ibekukungakwazi ukuyisebenzisa ibhola phambi kweepali. Izamile nayo iBuffalo ukuhlasela amatyeli aliqela kodwa khange kubekho thuba licacileyo elifumeneyo. Siphele isiqingatha sokuqala kungekho gowuli macala.

Ekubuyeni kwawo la maqela kwixesha lokuphumla, yiFC Buffalo ehlasele kuqala – qha ibhola yayo khange ibenalo ulwamvila. Bekufanele ukuba iFC Buffalo ifumene igowuli ngomzuzu weshumi elinesihlanu, qha umdlali wayo ukhethe ukuyichwakaza ibhola, yabanjwa nje lula ngunozinti weMorning Stars – uNgcingane Mtunzi. Kodwa kwimizuzwana nje emva koko, uMzwandile Lisiea, ufake igowuli leBuffalo lokuqala.

Oku kwenzeke emva kokuba iifolosi zeMorning Stars zibhutyuze ibhola phambi kwepali. Ngomzuzu wamashumi amathathu anesithandathu kwisigaba sesibini, uBuhle Kahlela, ufake elokulinganisa igowuli. Kwimizuzu nje emithathu emva koko uVuyolwethu Klaas ufake elesibini leMorning Stars – yatsho yahamba phambili. Kuthe xa kanye kushiyeke imizuzu emithathu phambi kokuphela komdlalo, yabuya iFC Buffalo nelesibini igowuli elifakwe nguMzwandile kwakhona. Ngalo ndlela umdlalo waphela la maqela ebambene ngamagowuli amabini macala.

Kumdlalo obuseBhayi namhlanje emalanga, iLion City izibethele iTornado ngo’2-1.