Igowuli
elifakwe ngu-Issa Sarr kwixesha elongezelelweyo lisindise i-Orlando Pirates
engozini ngethuba idlala neBaroka FC kobu busuku kumdlalo we-Absa Premier
Soccer League, e-Orlando Stadium.  Lo mdlalo
uphele ebambene la maqela ngo’1-1 nangona ibiyiBaroka FC ebinamandla namathuba acacileyo
okuphumelela umdlalo. Unozinti
wePirates, uSiyabonga Mpontshane, unqande amanzi engena endlini namhlanje
izihlandlo ngezihlandlo abadlali beBaroka befun’intwibilapha. UMatlakala noKunene
bafumene amathuba emhlabeni omhle weBucs – kodwa abakwazana ukumqhatha
uMpontshane ezipalini.

Esazulwini
sebala iBucs ibibophe uSarr no-Oupa Manyisa njengesiqhelo – kodwa akukho nto
ingako abayenzileyo ngenxa yoxinizelelo obelufakwa ngabadlali beBaroka kubo.
Uzamile ukuhlasela uThabo Rakhale kwicala lasekunene noThabo Matlaba kwicala
lasekunxele – kodwa iibhola zabo bezibhabha phezulu. Kuyiwe kwixesha lokuphumla
la maqela ebambene ngeqanda. Kwisigaba sesibini somdlalo, uKjell Jonevret, ufake uThabo
Qalinge noThamsanqa Gabuza, kwaphuma uMpho Makola noTendai Ndoro.

Ngokucacileyo,
lo mqeqeshi ebekhangela indlela yokuhlakaza iBaroka ebidlala umdlalo odibeneyo
namhlanje – konke oko akwenzekanga. UVictor Letsoalo utsale intambula ekude,
ihleli emnatheni emva kokugqitha kuMpontshane. Azamile AmaBhaka-bhaka kwade
kwavuleka ngethuba iSarr efaka igowuli lokulinganisa ekuphuleni komdlalo. Ngelishwa
iPirates ibuyele emva kwiPSL ngokungaphumeleli lo mdlalo, ihleli kwindawo
yeshumi. Yona iBaroka isayibambe emva, ukuba ibiphumelele ibizakufumana ithuba
lokusinda ezemebeni.

 Kumdlalo obuseMoruleng Stadium, iPlatinum Stars ibambene neFree State Stars ngo’1-1. IDikwena ithe finini kwindawo yeshumi, kanti yona iFree State ihleli kwindawo yeshumi elinesine kwaye ayikaphumi engozini yezembe nangona esekhona amathuba ukuba ingakwazi ukuqokelela amanqaku oneleyo kule midlalo ishiyekileyo.

Orlando Pirates: Mpontshane, Gcaba, Jele,
Matlaba, Phungwayo, Sarr, Shitolo, Manyisa, Rakhale, Makola, Ndoro.

Baroka FC: Masuluke, Mapetho, Kgoetyane,
Shaku, Madubanya, Garcia, Munetsi, Masenamela, Ogle, Kunene,
Matlakala.