Abuyela ekhaya amakhwenkwe kaMorgan Mammila izibilini zithe xibilili emva kokufumana inqaku elinye emdlalweni wanamhlanje. IChippa United isinde ngolambisa emva kokubambana neRoyal Am ngegowuli elinye macala emdlalweni weDStv Premiership obubanjelwe eChatsworth Stadium. Omabini amaqela aye emdlalweni ekhangela impumelelo emva kokungaqhubi kakuhle emidlalweni egqithileyo. Iqela likaMamkhize, iRoyal Am, liqhufuze iqanda emzuzwini wesithandathu uqalile umdlalo ngegowuli elifakwe nguMotebang Sera. Side saphela isigaba sokuqala iChippa United ebiziindwendwe ingafumananga nto.
Yohluthwe intlaka emlonyeni iRoyal Am ngethuba iChippa United ifumana igowuli elifakwe nguEtiosa Ighodaro emzuzwini wamashumi asibhozo anambini. Isixhenxe ngoku imidlalo engafumani mpumelelo kuyo iChippa United. Lo nto ibeka phantsi koxinizelelo uMammila owayeqale kakuhle ngokuphumelela imidlalo emine ilandelela ekukekeleni konyaka odlulileyo. Bekulindeleke iRoyal Am iphumelele namhlanje emva kokubethwa yiMaritzburg United nangaMaZulu emidlalweni egqithileyo. Nangona kunjalo, ihleli kwindawo yeshumi kwiDStv Premiership. Komnye umdlalo, iGolden Arrows iphoxekile emva kokubethelwa ekhaya yiTeam of Choice ngegowuli elinye emdlalweni obushushu ePrincess Magogo Stadium.
Noxa amaqela ezamile kwisigaba sokuqala, siye saphela kungekho nto ebhodini. Iintliziyo zaBafana Bes’thende zityunyuzwe nguJose Ali Meza ofake igowuli kwixesha likasompempe. Ziindaba ezimnandi ezi kuFadlu Davids ophumelele imidlalo emithathu ilandelelana ukusukela oko ethe wabuyela kwiMaritzburg United ehleli kwindawo yeshumi elinanye. Noxa iGolden Arrows ibikhe yabetha iSuperSport United kulo nyaka mtsha – kodwa iziphumo azincumisi kwaye isendaweni embi kwiDStv Premiership. Abaqeqeshi bayo bangazibhaqa belilifa lezembe ukuba izinto aziguquki emidlalweni elandelayo.
Abafundi bematriki ka2024 benze imbali!