Umqeqeshi weSpringbok, uJacques Nienaber, uya edabini elinzima neqela lakhe ngempelaveki ngaphandle kwabadlali abanamava abafana noSiya Kolisi no-Elton Jantjies. AmaBhokobhoko alungiselela ukudibana neWales emdlalweni wesibini wovavanyo oza kube useToyota Stadium, eBloemfontein, emalanga ngoMgqibelo. Iqela likaNienaber liya emdlalweni olandelayo likhuthazekile emva kokubetha iWales ngo’32-29 emdlalweni obunzima ePitoli kwiveki ephelileyo. Umqeqeshi wenze iinguqu ezininzi kwaye kukho nabadlali abatsha ekulindeleke banikwe ithuba lokudlalela AmaBhokobhoko okokuqala ebomini babo. Isizathu esibangele umqeqeshi afake imiqheliswa kungoba uzama ukulungiselela itumente yehlabathi ekunyaka ozayo.
Abadlali abafana noKurt-Lee Arendse no-Evan Roos baza kuqala umdlalo – kanti uNtuthuko Mchunu, uRuan Nortje, uDeon Fourie noGrant Williams banganikwa ithuba lokudlala noxa bengamalalela. UHandre Pollard, odume ngokukhaba amapenela, nguye umdlali omdala oza kukhokela iqela. Ngaphandle kwamathandabuzo, iWales iza kubuya inomsindo emdlalweni wesibini – kodwa umqeqeshi uthi lifikile ixesha lokunikwa kwabadlali abatsha ithuba lokudlala. “Satsho kwantlandlolo ukuba kufuneka sizame ukudibanisa abadlali abatsha nabadala. Kufuneka sibone abadlali abatsha ukuba yintoni abanokusinika yona emdlalweni okwinqanaba lehlabathi,” utshilo uNienaber.
“Ngabadlali ebesinabo kwa kwisizini egqithileyo aba sithetha ngabo nangona bekhona nabafikayo enkampini. Bakhona abadlali ekudala bethembisa. Sifuna ukubabona ngoMgqibelo. Ilwa kude kuphele umdlalo iWales. Isibonisile kwiveki ephelileyo. Asilindelanga nto entsha kuyo nakozayo umdlalo. Yiyo lo nto sifuna ukuvavanya abadlali bethu kuyo. Ukuba badlale kakuhle, ngokuqinisekileyo baza kuliqinisa iqela lethu. Nabo bayakuvuyela ukunxiba izikipha zeSpringbok. UHandre ngoyena mdlali omdala futhi ndinethemba lokuba uza kukhokela ngaphandle kwengxaki. Siyayazi iWales iza kuza kuthi ngamandla emva kokubethwa kwayo kwiveki ephelileyo – kodwa ndinethemba leziphumo ezihle ukuba sidlale kakuhle,” utshilo uNienaber.
Liyoyikisa izinga lokunyamalala kwamadoda eGqeberha!