ISpringboks sikhangela abaxhasi abatsha

ISpringboks siza- kuqubisana ne-Ireland kwimidlalo emithathu yovavanyo kule nyanga izayo ngaphandle komxhasi.

Unobangela wale nto ingaziingxaki ubuphantsi kwazo umbutho olawula umbhoxo kweli, iSARU, kunyaka ophelileyo. Ezi ngxaki zizo ezibangela kubenzima ukuba iSpringboks sifumane abaxhasi abasisigxina.

Inkampani enkulu nebixhasa iiBoks, * -ABSA irhoxile ukuvuselela isivumelwano sayo sokusebenza neBoks ngenxa yomcimbi ubusoloko ukhalazelwa wokungabikho kweenguqu kweli qela.

Bekukhe kwavakala amarhe okuba inkampani yakwaBidvest yiyo ezakungena endaweni ka-Absa njengabaxhasi abasisigxina.

Kukhe kwabakho ukulwa kubalawuli kwi-SARU kumaxesha adlulileyo, nento ethe yakhokelela ekubeni uRassie Erasmus abeke phantsi kwisikhundla sakhe njengomlawuli jikelele kwisebe lokuziqeqesha leSpringboks.

ISpringboks kulindeleke ukuba siqhubekeke sidlala ngesikipa semidlalo yovavanyo esenziwe kunyaka ophelileyo. Eli qela neliza- kuqeqeshwa ngu-Allister Coetzee okokuqala lizakuqala lidlale ne-Ireland, kwisikipa esimhlophe naluhlaza.

Kumdlalo wesibini weRugby Championship ne-Argentina iiBoks zizakube zinxibe isikipa sesiqhelo esiluhlaza namthubi.

Isikipa esitsha sabalandeli beSpringboks sisungulwe ngokusekweni ngoLwesine yiSARU nenkampani yakwa-ASICS. Akukho phawu labaxhasi abatsha abasisigxina kwesi sikipa sitsha.

Le midlalo izakuba yimidlalo yokuqala kaCoetzee, kwaye ufika sele kukho iingxaki ezambethe iSpringboks, nekuzakwenzeka ukuba zichaphazele umsebenzi wakhe nendlela asebenza ngayo nabadlali.