iStellenbosch senze umtsi oya phambili kwiCarling Knockout wancoma uBarker

Kumaqela asibhozo abeshiyeke kwiCarling Knockout Cup, iStellenbosch FC ibe liqela lokuqala elingene kumjikelo ophambi kowokugqibela. Oku kwenzeke emva kokuba iStellenbosch idlule kwiPolokwane City ngamagowuli amabini eqandeni (2-) emdlalweni obubanjelwe ePeter Mokaba Stadium ngokuhlwa kwayizolo. Amagowuli amabini eliphumelele ngawo iqela laseNtshona Koloni afakwe ngu-Iqraam Rayners noDevin Titus.

Emva komsebenzi omhle awenzileyo izolo, uRayners ufumene elinye ikhulu lamawaka erandi (R100,000) emva kokuba evotelwe ngabalandeli njengomdlali othe waqaqamba emdlalweni. Lityeli lesithathu iStellenbosch ihamba umgama omde emidlalweni yendebe. Kwinyanga yoMsintsi, iStellenbosch sikhutshwe yi’Orlando Pirates ngongciphu emidlalweni weMTN8. Kanti kwisizini egqithileyo, ibikhe yazama nakwiNedbank Cup.

Kwiinyanga ezidlulileyo, uSteve Barker uyibeke yacaca into ethi iqela lakhe liza kulwela ukuphumelela indebe kule sizini ngoba sekulithuba lidlala kwiPSL. UBarker uthe iqela lakhe linamava okumelana nemidlalo yeendebe emva kokuzama kwiNedbank Cup nakwiMTN8 ngokulandelelana. “Ndicinga ukuba sifundile kwiinzame zethu zangaphambili,” utshilo uBarker. Ngaphandle kwamathandabuzo, iqela lakhe liza kulwela ukuphumelela indebe yeCarling Knockout okokuqala ngoku idlalelwa ngamaqela onke adlala kwiDStv Premiership.

“Emva kokuba sidlale safika kwisigaba samanqam emidlalweni yeendebe, siyankqonkqoza ecangweni esicinga ukuba liza kude livuleke. Siyankqonkqoza futhi ngamandla. Masijonge ngoMvulo ukuba sithelekiswa neliphi na iqela. Ndinethemba lokuba kwityeli lesithathu kuzawuphumelela thina,” utshilo uBacker emva komdlalo izolo ebusuku. Ukuphumelela indebe yeyona nto edingwa yiStellenbosch ngoba iqhuba kakuhle kwiDStv Premiership evala isizini kuyo isendaweni ehloniphekileyo.