Eyona folosi eyingozi ebholeni yaseMzantsi Afrika, uPeter Shalulile, yenze edume ngazo kwakho ngethuba iMamelodi Sundowns ibetha iTS Galaxy ngo’1-0 emdlalweni weDStv Premiership obuseMbombela Stadium ngale njikalanga yanamhlanje. UShalulile ufake igowuli ephumelele ngalo iSundowns kwangoko kwisigaba sokuqala.
Le ndedeba yaseNamibia ngokuzalwa ifake ibhola ngentloko emva kokuba abadlali beGalaxy boyiswe kukuchitha kakuhle ibhola ebisuka ekoneni. Ngoku iSundowns iqikaqikeka phezulu kwiDStv Premiership, ishiya ngamanqaku asixhenxe AmaZulu akhe azama ukuyisokolisa emva kokuqhuba kakuhle emidlalweni yawo.
Igowuli elifunyenwe nguShalulile lize emva komdlalo omhle wabadlali beSundowns. Emva koko, abadlali beTS Galaxy bayibeke phantsi ibhola baya phambili. ULyle Akay ukhabe ibhola ebethe esandleni kumdlali wasemva weDowns – uMosa Lebusa. Ngalo ndlela iGalaxy ifumene ithuba lokufaka igowuli lokulinganisa.
Ngelishwa lakhe uLindokuhle Mbatha, ipenela yakhe ithintelwe nguKennedy Mweene – obengene endaweni kaDenis Onyango, oqhele ukuba phakathi kweempondo xa idlala iSundowns. Akukho nto eyenzekileyo emva koko nangona abadlali abafana noLebo Maboe, uGift Motupa noShalulile bekhe bazama ukunkqonkqoza ezipalini zeTS Galaxy.
Iye yanyusa umxakathi iTS Galaxy kwisigaba sesibini ebikhangela kuso igowuli lokulinganisa nelokuphumelela. Ayikwazanga ukugqobhoza emva kwiDowns ebixhathise ngamadoda athembekileyo afana noLebusa noRicardo Nascimento. Ithuba elifunyenwe yiTS Galaxy emizuzwini yokugqibela liphelele emoyeni ngethuba uWayde Lekay eqabelisa phezu kweepali ibhola ebigotywe kakuhle ekunene nguGaona Modisane.
Ukuphumelela kweSundowns kuthetha ukuthi isecicini lokuphumelela indebe (DStv Premiership) amatyeli amane elandelelana. Yona iTS Galaxy sele iyiqinisekisile indawo yayo kwiDStv Premiership kwisizini ezayo noxa ibethiwe nje namhlanje.
TS Galaxy: Van der Linde, Bodibe, M. Mahlangu, Msimango, Seedat, Mokoena, Brooks, Mbunjana, Aubaas, Mbatha, Macuphu.
Amalalela: Buthelezi, Shozi, Lekay, Munyai, Modisane, S. Mahlangu, Phohlongo, Matlala, Letsholonyane.
Mamelodi Sundowns: Mweene, Nascimento, Lebusa, Coetzee, Mudau, Modiba, Maboe, Jali, Mkhuma, Shalulile, Motupa.
Amalalela: Goss, Affonso, Sirino, B.Onyango, Lakay, Morena, Domingo, Vilakazi, Mvala.
Liyoyikisa izinga lokunyamalala kwamadoda eGqeberha!