Amanenekazi weMamelodi Sundowns athwaliswe isithsaba sobuntshatsheli ngokusesikweni emva kokuvala isizini ehleli kwindawo yokuqala kwiHollywoodbets Super League. Amasandawana abethele oogqirha nezicaka iMaIndies Ladies ngamagowuli asixhenxe eqandeni (7-0) emdlalweni wokugqibela wesizini ngempelaveki egqithileyo. Emva kwemidlalo yonke yesizini, iSundowns Ladies ivale inamashumi asixhenxe anesithathu amanqaku. Indebe yeHollywoodbets Super League ifikele kweyeCAF Champions League neyeCosafa Women’s Champions League eziphunyelelwe yiSundowns kwiinyanga ezigqithileyo kulo nyaka uphelayo.
Umqeqeshi weSundowns Ladies, uJerry Tshabalala, uzingomba isifuba ngomsebenzi omhle owenziwe liqela lakhe kulo nyaka. “Ndizingomba isifuba ngomsebenzi owenziwe ngamanenekazi wethu. Bekunzima kakhulu ukudlala iitumente ezinkulu kube kukho imidlalo yeSuper League ecaleni. Le ndebe yeSuper League ngumvuzo wokuzinikela kwabadlali ababile besoma unyaka wonke. Sizimisele ukwenza umsebenzi omhle nakunyaka ozayo, hayi apha eMzantsi Afrika kuphela, nakwinqanaba lehlabathi,” utshilo uTshabalala emva komdlalo kutshanje.
Ngokuphumelela kwayo iSundowns Ladies, ithiwe jize ngezigidi ezibini zonke zerandi (R2-million) yanikwa nendebe ekhatshwa ziimbasa zegolide. Umphathi weHollywoodbets, uNksz. uSandisiwe Bhengu, uvuyisene neSundowns ephumelele indebe ebalulekileyo emdlalweni wamanenekazi eMzantsi Afrika. “Siyavuyisana neSundowns. Idlale kakuhle kakhulu kwaye yenze umsebenzi ongaphaya kwento ebesiyilindele. Kube kuhle ukubambisana neSafa kwaye sizimisele ukuqinisekisa ukuba ibhola ekhatywayo yamanenekazi inyukela kwelinye inqanaba,” uvale ngaloo mazwi uBhengu.
Lusindiso Ndabakayise uthi iMighty Eagles iza kudlalela ukuwawisa AmaZulu!