ISundowns yohlwaye kabuhlungu iStellenbosch etsala nzima eLoftus Stadium

Igoduka
intywizisa iStellenbosch etsala nzima emva kokuba yohlwaywe yiMamelodi Sundowns
ngamagowuli amathathu onke kwelinye (3-1) emdlalweni we-Absa Premiership
obubanjelwe eLoftus Stadium ebusuku namhlanje. Umqeqeshi weSundowns, uPitso
Mosimane, uqale umdlalo ngabadlali abafana noThemba Zwane obekade onzakele,
uKennedy Mweene, uNicholus Lukhubeni, uTiyani Mabunda noRivaldo Coetzee.
Iinguqu uzenze uPitso kuba ezama ukuphepha ukonzakalelwa ngabadlali phambi
komdlalo weTelkom Knockout wokugqibela ophakathi kweqela lakhe neMaritzburg
United emalanga ngoMgqibelo, eMoses Mabhida Stadium. Abatshakazi bePSL
(iStellenbosch) batsazise igazi kuqala kwisigaba sokuqala somdlalo ngebhola
yentloko efakwe nguRyan Moon ofumene ibhola entle kuVan Heereden. Emva kokudlala
kakuhle isiqingatha sokuqala, iqela laseNtshona Koloni liye kwixesha lokuphumla
lihamba phambili. Ligowuli elo elithe laqinisa umdlalo wayo iStellenbosch
ebekubonakala ukuba iye ePitoli ingazimiselanga kulahlekelwa ngamanqaku.

Isidlale kakuhle
isiqingatha sokuqala kekambe nayo iSundowns. Into engakwazanga ukuyenza
kukugqobhoza kubadlali beStellenbosch basemva abenze umsebenzi oncomekayo.
UZwane, onethuba elide engasadlali, ngomnye wabadlali abenze umahluko
emdlalweni ngokudala amathuba. Emzizwini wamashumi amahlanu nesixhenxe, uZwane
ufake igowuli lokulinganisa ngepenela ayiphiwe ngusompempe emva kokuziwisa
emhlabeni kanozinti. Igowuli lesibini leSundowns lifakwe nguSphelele Mkhulise
ofumene ibhola elungisiweyo kuThemba Zwane. UKapteni weStellenbosch, uMogamad
De Goede, ukhutshwe ngekhadi elibomvu ngenxa yokudlala kakubi uRevaldo Coetzee.
Lo nto inike iSundowns ithuba lokuthathela kuyo umdlalo ngokupheleleyo.
UKeletso Makgalwa, ongene endaweni kaJose Ali Meza, ufake igowuli lesithathu. Yena
uReyaad Pieterse uzibizele ikhadi elibomvu engaphandle kwebala ngenxa
yokuxambulisana nomncedisi kasompempe. Ukuphumelela kwayo iDowns kuyikhuthaza
ngakumbi phambi komdlalo wendebe oseMoses Mabhida Stadium ngempelaveki.

Sundowns: Mweene, Lakay, Lukhubeni, Madisha,
Mabunda, Coetzee, Arendse, Vilakazi, Mkhulise, Zwane, Meza.

Amalalela:
Pieterse, Affonso, Lebusa, Ngcongca, Makgalwa, Maboe, Ngoma.

Stellenbosch:
De Jong, Mobbie, Van Heerden, De Goede, Mthethwa, Awono,  Zungu, Matsi,
Rayners, Isaacs, Moon.

Amalalela:
Langeveldt, Du Preez, Skelem, Ndlovu, Motsogi, Robertson, Franco.