Emva kokuba kungabangakho qela elikwazileyo ukuphumelela phakathi kweChippa United neMamelodi Sundowns, kuye kwanyanzeleka ukuba umdlalo uye kwiipenela. Iphumelele ngo’5-3 kumapenela iSundowns. Umdlalo wesibini weHome of Legends Cup ubutaka iintlantsi. Abalandeli beSundowns bebenethemba lokuba iqela labo liza kuwusonga kwangoko umdlalo emva kokufumana igowuli kuqala. Yalile iChippa United ebizimisele ngeyona ndlela. Nangona umdlalo ubumhle – kodwa khange kubekho mathuba acacileyo kakhulu emdlalweni.
Kuyiwe kwixesha lokuphumla amaqela ebambene ngegowuli elinye macala. Umdlalo wesibini uye wohluka kowokuqala odlalwe ilanga lisatshisa kakhulu. Kuqale iChippa United ukunkqonkqoza ezipalini zikaReyaad Pieterse. Emizuzwini embalwa uqalile umdlalo, uEva Nga Bienvenu uphantse wenza idemeshe – kodwa ngelishwa ibhola yakhe iphume ngaphezulu kweepali. Omabini amaqela anyuse umxakatho ezama indlela angafumana ngayo igowuli emdlalweni obutaka iintlantsi.
Omnye wabadlali abaselula onikwe ithuba lokudlala, uSiyanda Msani, ufake igowuli lokuqala emdlalweni yatsho yahamba phambili iMamelodi Sundowns. Kudlule imizuzu emithandathu, yaphindisa nayo iChippa United ngegowuli elifakwe nguSean Ndlovu. Abuye kwixesha lokuphumla axheshana kwakhona amaqela esebenzisa iidyongwana ezidlala kakhulu kwiDiski Challenge. Ekugqibeleni, iphumelele ngo’5-3 kwiipenela iSundowns.
iEFF imenywe kwimibhiyozo yeMK Party