Umdlalo olidabi lobukhaya obuphakathi kweSuperSport United neMamelodi Sundowns utake iintlantsi njengesiqhelo. Okuye kwahluka kweli ityeli kukuba iSuperSport United ikwazile ukuziphindezela ngamagowuli amabini kwelinye (2-0) emdlalweni weDStv Premiership obubanjelwe eLucas Moripe Stadium ebusuku namhlanje. Abethe ngenqindi phantsi Amatsatsantsa athi: ngeke sibethe kabini liqela elinye. Kwiveki ephelileyo ePitoli, iSundowns iphumelele ngamagowuli amabini eqandeni (2-0) emdlalweni weMTN8 Cup obuseTuks Stadium. Iziquququ zeDowns ezifikayo, uMarcelo Allende no-Abubeker Nasir, ziqale umdlalo namhlanje okokuqala – kodwa ngelishwa, azikwazanga ukuyinceda namhlanje.
Emzuzwini wesibhozo kwisigaba sokuqala, uThapelo Maseko uqhufuze iqanda ngegowuli alifumene ngebhola ayinikelwe yifolosi ekhuthele kakhulu, u-Iqraam Rayners. Bazamile ukuhlanganisa iibhola abadlali beDowns bekhangela igowuli lokulinganisa. Phambi kokuphela kwesigaba sokuqala, uBradley Grobler ufake igowuli lesibini leSuperSport United. Nakubeni iSundowns ibihamba emva – kodwa wona umdlalo wayo ubumhle futhi ibiyiyo ebihlasela. Emva kokufumana amagowuli kwangoku emdlalweni, abadlali beSuperSport bavale mba emva. UThulani Hlatshwayo ngoyena mdlali oyithinteleyo iDowns ebiyinkathazo macala. Amathuba wona ebekhona – kodwa bekunzima ukugqobhola kuGeorge Chigova ezipalini.
Kuthe kwakucaca ukuba kuhamba ixesha iDowns ingabhaqi nto, abaqeqeshi bafake uThemba Zwane, uSipho Mbule noSurprise Ralani. Ubukho babo benze umahluko omncinci kakhulu ngoba umdlalo ubusele ukuyo iSuperSport United. Ikwazile noko iSundowns ukufumana igowuli lokubika ekhaya. Lona lifakwe nguNasir kwixesha likasompempe. Lo ibingumdlalo wesibini iSundowns ephulakana nawo kule sizini eqhubekayo. UGavin Hunt, obesoloko ekhala ngokungabinabadlali, ufumene impumelelo entle kwaye umdlalo wanamhlanje uza kuphungula umthwalo ebadlalini bakhe abangayiqalanga kakuhle ncama isizini njengeminye iminyaka. UHlatshwayo, ochithwe yiPirates kutshanje, ufumene iwonga lomdlali oqaqambileyo emva komdlalo.
SuperSport United: Chigova, Dithlokwe, Hlatshwayo, Lungu, Bhasera, Nhlapo, Mbatha, Maseko, Johannes, Grobler, Rayners.
Amalalela: Pule, Philipps, Rapoo, Donn, Maziko, Ngoma, Webber, Maswanganyi, Gabuza.
Mamelodi Sundowns: Williams, Lakay, Morena, B. Onyango, DE Reuck, Jali, Mokoena, Nasir, Allende, Shalulile.
Amalalela: D.Onyango, Mudua, Lebusa, Ralani, Mkhulise, Mbule, Zwane, Modiba, Mvala.
IPirates idibana neentanga zayo namhlanje kwiMTN8, utsho uSage Stephens!