Amaqela waseMpuma Koloni adlala kwiHollywoodbets Super League akhe ahamba nzima ekuqaleni kwesizini – kodwa okuncumisayo mvanje kukubonakala kwawo ekhula iimpiko. Ukuza kuthi ga ngoku, amaqela amaninzi adlale amashumi amabini anesihlanu namashumi amabini anesine emidlalo ibekhona nemingqandandana yamaqela angeneno kuloo maqela ngemidlalo. IThunderbirds Ladies yaseGcuwa izinze kwindawo yethoba – indawo engentshanga kuyo ncam. Kanti yona iCity Lads yaseGqeberha ihleli kwindawo yeshumi elinambini. Kumnandi kubalandeli beCity Lads ngoba iyathembisa emva kokuhlala etshobeni leSuper League ixesha elide.
Zikhona iintlantsi ezibonisayo ukuba iCity Lads ingayivala isizini, esondela esiphelweni, isendaweni endilisekileyo. Kanti nayo kwelayo icala iThunderbirds inalo ithuba lokwenza ngcono kunesizini egqithileyo. Ukuze lo nto yenzeke, kufuneka iyiphumelele yonke imidlalo eshiyekileyo. Umsila uphezulu enkampini yeThunderbirds Ladies emva kokuvuthulula iFirst Touch FC ngamagowuli amathathu onke emdlalweni obungempelaveki egqithileyo. Iya emdlalweni obalulekilekileyo ngoku inaloo mfutho. Iqela laseGcuwa liza kudibana neVasco Da Gama emdlalweni weHollywoodbets Super League obekelwe intsimbi yesithathu ngoMgqibelo emalanga.
Nangona onke amaqela esilwela ukufumana amanqaku njengokuba isizini ikekela – kodwa akufanelanga isokoliswe kakhulu iThunderbirds liqela elisekela amaqela ajingelwa lizembe esileni weSuper League. Kwelinye icala, iCity Lads ebikhe yaphumelela imidlalo emibini ilandelelana, idlale neJHB FC izolo. Ngelishwa iziphumo zomdlalo zifike iphepha selishicilelwe. Emdlalweni olandelayo, iCity Lads iza kuziva amandla kwiCostal City Wizards. Umdlalo uza kuba nzima ngoba iCity Wizards isemva kweCity Lads ngokwamanqaku. Lo nto ithethe ukuthi amaqela aza kuya emdlalweni efuna into enye: amanqaku amathathu.
Ubomi ejele kutata owadlwengula intombi yakhe ngokuphindaphindiweyo