IWits igoduke namanqaku amathathu emva kokuntywilisela iChippa United

Emva kwamashumi
alithoba emizuzu, umdlalo we-Absa Premiership obuphakathi kweChippa United uphele
iBidvest Wits iphumelela ngo’1-0 eSisa Dukashe Stadium. Igowuli leWits lifakwe
nguBuhle Mkhwanazi emva kwekona ekhatywe nguDeon Hotto. Isathiwe mbende
yimbalela iChippa emva kokuba ingakwazanga ukuphumelela umdlalo wayo wokuqala
kwesibhozo eyidlalileyo kule isizini. Kanti yona iWits iphumelele umdlalo wayo
wesihlanu emidlalweni emithandathu eyidlalileyo. UMbuyiselo Sambu, obexhuzula
imikhala kwiChippa emva kokugxothwa kukaDuran Francis izolo, uqale umdlalo
ngamadoda afana noLehlogonolo Masalesa noTecious Malepe esiswini. UGavin Hunt
ugoduka exolile ngoba liqela lakhe elidlale umdlalo ongcono. Akukho nto
encomekayo emdlalweni weChippa ngoba ibidlala umdlalo ongadibenanga.

Amaqela aye
kwixesha lokuphumla kungekho elikwazileyo ukubhalisa ebhodini. Umdlalo uqale
kakuhle, omabini amaqela ebebonakala efuna ukudlala ibhola eya phambili.
Akubanga xesha libhelekelephi, iBidvest Wits iwuthathele kuyo umdlalo. UHaashim
Domingo noCole Alexander ngawona madoda weWits ebeyingozi futhi ibikwangawo abetyala
iibhola eziphucukileyo kubadlali abafana noMxolisi Macuphu. Iqela likaGavin
Hunt lihlasele macala onke – kodwa abadlali beChippa United abavumanga ukuvula
emva. Ifumene iikona ezintlanu iWits kwisigaba sokuqala somdlalo – into ebonakalisa
mhlophe okokuba ibifuna igowuli kwangoko emdlalweni – kodwa into engakwazanga
ukuyenza kukufaka ibhola emnatheni. Elona thuba elicacileyo leWits lize
ngethuba uMacuphu etsala intambula yebhola ecikwe nguPatrick Tignyemb.

Emva kokungakwazi
nokukhabela unozinti kwisigaba sokuqala, iChippa United iqale apho ibiyeke
khona ngokuphisa ngebhola kwiWits. Kubekho intlantsana ebonakalayo kwiChippa emzuzwini
wamashumi amahlanu anesibini ngethuba uRicardo Goss ebamba ibhola ebizanywa
nguRhulani Manzini noThabo Rakhale. Ifumene ikona yokuqala iChippa United
emdlalweni emva kweshumi elinesihlanu lemizuzu kwisigaba sesibini emva kwemigudu
eyenziwe nguRakhale. Udlale ibhola entle uTecious Malepe esekunxele – kodwa ibhola
yakhe ibanjwe lula nguGoss ngoba bekungekho mntu ebhokisini. UHunt ukhuphe
uTerrence Dzvukamanja waze wafaka uGift Motupa endaweni yakhe. UZitha Macheke,
obefudula edlalela iChippa, ebebane egoba iibhola ezintle kwaye udlale umdlalo
oncomekayo ephikweni lasekunene. UKurt Lentjies uthathe indawo ka-Andile
Mbenyane phambi komzuzu wamashumi asixhenxe. IWits intywilisele iChippa ngo’1-0
emdlalweni obudikidiki.

Chippa: Patrick Tignyemb, Frederic Nsabiyumva, Gerald
Modisane, Elvis Moyo, Lehlogonolo Masalesa, Boikanyo Komane, Kevin Moyo, Andile
Mbenyane, Tercious Malepe, Thabo Rakhale, Rhulani Manzini.

Wits: Goss Ricardo, Thulani Hlatshwayo, Thabang
Monare, Haashim Domingo, Deon Hotto, S’fiso Hlanti, Buhle Mkhwanazi, Zitha
Macheke, Cole Alexander, Mxolisi Macuphu, terrence Dzvukamanja.