Iqela lesizwe loMzantsi Afrika lombhoxo, Amabhoko-bhoko, liyantywizisa emva kokuphulukana nomdlalo walo okokuqala phantsi komqeqeshi omtsha, u-Allister Coetzee, izolo eSalta kwilizwe lase-Argentina.

Amabhoko-bhoko ebethwe ngo’26-24 yi-Argentina eyaziwa ngokuba ziiPumas ngabalandeli bayo kumdlalo obubambene kakhulu kwisiqingatha sokuqala.

Impumelelo yeePumas iqinisekiswe nguSantiago Gonzalez Iglesias ofake ipenela emva kokungena njengelalela emdlalweni.

Omabini la mazwe alele emgceni izihlandlo ezibini [icala ngalinye] phambi kokutshintshwa kwamacala – kodwa iiPumas bezihamba phambili ngo’13-3.

Lo ngumdlalo wesibini ophunyelelwe yi-Argentina kwimidlalo engamashumi amabini anesine eyidlale naMabhoko-bhoko.

Yimpumelelo yeePumas yesithathu le kwimidlalo yeChampionship ukusukela ngo’2015.

Umdlali wasephikweni woMzantsi Afrika, uBryan Habana, ulele emgceni ityeli lamashumi amathandathu anesihlanu (65) kwimbali yakhe yombhoxo kwiqela lesizwe izolo.