Indlela eyivuyele ngayo iTS Galaxy impumelelo eyizuze kwi-Orlando Pirates iyamangalisa. Amakhwenkwe kaTim Sukazi abethe iintaka ezimbini ngelitye elinye kule iveki. Oku kwenzeke emva kokuba iTS Galaxy ibethe iPirates ngo’1-0 emdlalweni weDStv Premiership obuseMbombela Stadium. Iqela lakwaNgwane belibuyisa izitya emva kokubethwa kwalo yiPirates emdlalweni wokuqala wesizini eSoweto ekuthambekeni konyaka ophelileyo. UMnu. Sukazi wagoduka enesigqukru ngoba wadlakatheliswa kakubi ngoonogada bePirates esangweni ababengafuni angene ebaleni. Emva koko iqela lakhe laye labethwa emdlalweni.
Ngorhatya lwangoMvulo wale veki, iTS Galaxy ithathe amanqaku amathathu kwiBucs yatsho yafumana ithuba lokubhekela nakwizembe elijingela amaqela amaninzi njengokuba kusongwa isizini yeDStv Premiership kule nyanga kaCanzibe. Ukuphumelela kweqela likaSukazi kulandele isigwebo sekomiti yoluleko yePSL esithe iPirates inetyala lokungamvumeli angene ebaleni emdlalweni wokuqala. Ngoku iTS Galaxy ihleli kwindawo yeshumi elinesithathu emva kokuqokelela amashumi amabini anesithandathu amanqaku. Umqeqeshi weGalaxy, uSead Ramovic, ubancomile abadlali bakhe emva kokuntywilisela iPirates enemidlalo emithathu ingasaphumeleli kwiDStv Premiership. Igowuli ephumelele ngayo iTS Galaxy lifakwe nguLifa Hlongwane kwisigaba sokuqala somdlalo.
“Yimini enkulu kakhulu kuthi le. Ndiyavuyisana nabalandeli bethu – kodwa mandiyincome iPirates ngokudlala kakuhle umdlalo obunzima kakhulu,” utshilo uRamovic eboncume olukabhulankethe. “Siye emdlalweni sinecebo lethu lokuqubisana nePirates. Abadlali bethu badlale ngendlela ebesicwangcise ngayo. Ndifuna ukuncoma iqela lonke ngomsebenzi omhle eliwenzileyo. Umdlalo ubulawulwa sithi kwaye asiyivumelanga iPirates ikwazi ukudlala ngendlela yayo yesiqhelo. Isiqalo sethu besisihle, abadlali basemva badlale kakuhle kwaye sikwazile nokulwela okusifaneleyo ebaleni,” utshilo uRamovic osecicini lokusindisa iTS Galaxy awafika izika emva kokuqala kakuhle isizini phantsi kukaDan Malesela ongumqeqeshi weMarumo Gallants ngoku.
Libanjelwe isatifikethi sikaGrade 12 somgunyathi iGosa lezeMpilo