Umdlali ophambili
kwi-Orlando Pirates, uThembinkosi “Nyoso” Lorch, akonwabanga konke konke
kukuphoswa kwakhe lithuba lokuyofezekisa iphupha lakhe lokudlala phesheya
kolwandle. ULorch uphumelele iwonga lomdlali oqaqambileyo (Absa Premiership
Footballer of the Season) nomdlali oqaqambileyo ochongwe ngabanye abadlali
(Players’ Player of the Season) kwisizini egqithileyo. Ngaphezulu koko uye wafumana
indawo kwiqela lesizwe, iBafana Bafana, elenza imbali ngethuba libetha iEgypt phambi
kwenkitha yabalandeli bayo emdlalweni we-Africa Cup of Nations. Ukudlala kwakhe
kakuhle uLorch kwabangela ugxalathelwano lezicelo zamaqela aphesheya
kwiPirates. Phakathi kwaloo maqela kukho iRoyale Union Saint-Gilloise
yaseBelgium ebikade idlalelwa nguPercy Tau, uDijon football
d’Or neToulouse FC yaseFrance.
Kuthiwa iSaint-Gilloise
ibizimisele ukumthenga uLorch ngemali ekwizigidi ezingamashumi amabini erandi
(R20-Million). Kodwa iPirates ayikwazanga ukumkhulula kunjalo. “Ebekhona
amaqela andifunayo phesheya – kodwa akubeke etafileni bekungenelanga kwiPirates
nakum. Ndinesivumelwano nePirates, kufuneka ndibeke ingqondo yam ekudlaleleni
yona. Mhlawumbi liza kuvela elinye ithuba elihle,” utshilo uLorch. “Kundikhathazile
ukungayi kwam phesheya ngoba akekho umdlali apha eMzantsi Afrika ongakufuniyo
ukuya phesheya okwelikhabathiso ndikulo ngokweminyaka. Kufuneka ndisebenze
ngokuzimisela, mhlawumbi ikhona enye into eyakuvela. Ukuba kungavela elinye
iqela nemali engcono, kufuneka iPirates indikhulule. Andikhathali nokuba ndiya
kweliphi iqela, andikhethi. Into endiyifunayo kukudlala nabadlali abaphezulu
ebholeni. Kodwa ke okwangoku ndinesivumelwano nePirates kwaye kufuneka
ndiyihloniphe lo nto,” utshilo uLorch.
Kwiinyanga ezidlulileyo,
iPirates ithengisele iqela laseFrance ekuthiwa yiReims umdlali ogama
linguMarshal Munetsi. Phambi koko kuthengiswe uLyle Foster kwi-AS
yaseFrance. ULorch ukhale ngabaqeqeshi abathi ebengakufanelanga ukufumana
iwonga lomdlali wonyaka. Nangona engalikhankanyanga igama – kodwa bekucacile
ukuba uthetha ngomqeqeshi weMamelodi Sundowns, uPitso Mosimane, owathi iwonga
belifanele ukuba lifunyenwe nguHlompho Kekana. “Akekho umntu ekufanele
ndidlalele ukuzibonakalisa kuye. Ngeke ndibize amagama wabantu – kodwa kukho
abaqeqeshi abasebenzisa thina xa bezamela abadlali babo. Bathi kufanele uLorch
abonise ukuba ungumdlali ophambili ngokuthi afake amagowuli kwiBafana Bafana.
Le nto yenzeke kwisizini egqithileyo ngethuba ndiphumelela iwonga eliphambili.
Abaqeqeshi abathile bebesoloko bethetha ngoyena mntu ofanele iwonga. Lo nto
indenze ndafuna ukusebenza ngokuzimisela okukhulu. Kodwa kufuneka ndincedise
iqela lam ukuze liphumelele indebe ngoba akukho nto esiyifumeneyo kwisizini
edlulileyo,” utshilo uLorch.
Ezimnyama
ziza kwamkela iChippa United emdlalweni we-Absa Premiership oza kube
use-Orlando Stadium ngentsimbi yesithandathu emalanga ngomso (uMgqibelo).
Iphuncule amanqaku amathathu iChippa United emdlalweni obuseMonti!