Kuzawuqhawuka kuhlangana kumdlalo ophakathi kweCape Town City neChippa United we-Absa Premier Soccer League ngo’19:30, e-Athlone Stadium, ngoMvulo ozayo.
La maqela abonwa ngabalandeli njengawona adlala ibhola ephucukileyo. Ngumdlalo onzima lo kwiiChili Boys ngoba ziya kwiqela elinxanelwe impumelelo, elikhokelwa nguLebogana Manyama oyingozi phambi kwepali.
Umqeqeshi weChippa, uDaniel “Dance” Malesela, yindoda engoyikiyo – kodwa kufuneka azilungiselele ngoba iCitizens ayichamisi.
IiChilli Boys ziya kulo mdlalo zinamandla emva kokubetha iWitbank Spurs ngo’1-0 kumdlalo weNedbank Cup kutshanje eBhayi.
UDiamond Thopola, osuka enkampini yeBafana Bafana, kulindeleke adlale indima ebalulekileyo kulo mdlalo njengesiqhelo.
Omnye wabadlali ozakuthwala ubunzima nguPaseka Mako. Udlala kakuhle kakhulu ukusukela mhla kwahamba uMarc van Heerden owathathwa yi-Orlando Pirates ekuqaleni konyaka.
UMako nguye ekulindeleke ajongane noManyama – oyena mdlali onamagowuli amaninzi kwiPSL. Kungokunje iChippa United ibambe kwindawo yethoba kwiPSL, inamanqaku angamashumi amabini anesithathu phantsi kwegama layo. Kwisigaba sokuqala sale sizini iziphumo zeChippa khange zincumise – ngoku kunyanzelekile iqokelele amanqaku kangangoko kwimidlalo eseleyo ukuze ivale le sizini ikwindawo engcono njengakwisizini ka’2015/16.
Njengokuba kungekho lula ukubetha kweCity – kodwa yona iyakwazi ukuwanqoloba amanye amaqela. Akuthandabuzeki, * -Eric Tinkler, ufuna amanqaku apheleleyo kulo mdlalo ukuze iqela lakhe libambelele phaya enkcochoyini yePSL.
Kunyanzelekile ke iCape Town City iphumelele – lo nto ngeke ibelula ngoba nayo iChippa idinga amanqaku kwaye unawo amandla wokubetha naliphi iqela kwiPSL. Lo mdlalo ubaluleke kuwo omabini la maqela kwaye akazibandezi omabini.
Imidlalo yePSL
NgoMgqibelo: SuperSport United vs Baroka FC @Mbombela Stadium 15:00; Golden Arrows vs Highlands Park @Prince magogo Stadium 15:00; Free State Stars vs Orlando Pirates @James Motlatsi Stadium 18:00; Bidvest Wits vs Platinum Stars @Bidvest Stadium 18:00; Maritzburg United vs Ajax cape Town @Harry Gwala Stadium 18:00
NgeCawe: Polokwane City vs Bloemfontein Celtic @Old Peter Mokaba Stadium 15:00
pedro.mapelo@inl.co.za
UHugo Broos uzityanda igila ngokudlalisa uVeli Mothwa izolo