Iqela laseMpuma Koloni, iChippa United, ekuphela kwalo elidlala kwiPremier Soccer League lizimisele ukwenza izinto ngendlela eyahlukileyo kunesizini edlulileyo.
Umqeqeshi weChippa, uClinton Larsen, usebenzise ikhefu leeveki ezimbini njengethuba lokuqinisa amajoni wakhe ngakumbi emva kokubambana ngo’1-1 neMamelodi Sundowns kutshanje eNelson Mandela Bay Stadium.
Phambi kwalowo umdlalo, iChippa idlale ngokulingana nabatshakazi bePSL, iStellenbosch, emdlalweni wokuvula isizini owaphela kungekho qela elikwazileyo ukubhalisa ebhodini.
Ngoku uLarsen ulola izikrweqe zakhe phambi komdlalo obalulekileyo weAbsa Premiership ophakathi kweChippa United neGolden Arrows ngo’15:00 ngoMgqibelo, eSugar Ray Xulu Stadium.
Akukho nto ingenye ngaphandle kwamanqaku amathathu afunwa ngumqeqeshi weChippa United – kodwa wazi kakuhle okokuba iqela lakhe liza kudibana neGolden Arrows ekelemileyo emva kokubethwa ngo’5-0 yiBloemfontein Celtic emdlalweni ogqithileyo eDr Molemela Stadium.
“Siya emdlalweni oza kuba nzima kakhulu. Libala ngokwenzeke eBloemfontein, uza kufika umhla womdlalo uSteve (Komphela) ebalolile abadlali bakhe.
Kufuneka sizilungiselele umlo eThekwini. Siya kuyo singenalo ixhala ngoba amaqela aza kusihlonipha ngenxa yendlela esidlale ngayo kakuhle emidlalweni emibini edlulileyo,” utshilo uLarsen ovuyiswe yindlela iqela lakhe eliqubisene ngayo neSundowns emdlalweni odlulileyo.
ULarsen uthe ikhefu limncedile ngoba usenabadlali abatsha afuna ukubadibanisa kakuhle nabadala ukuze badlale umdlalo odibeneyo emidlalweni elandelayo.
“Emva kwemidlalo esiyidlalileyo, ndingatsho ukuthi zininzi izinto ezifuna ukuqiniswa emdlalweni wethu emva naphambili.
Into endiyithandayo kukuzimisela kwabadlali bethu.
Sinabadlali abazimiseleyo ukusebenza kwaye lo nto iyandivuyisa kakhulu. Asifuni iChippa yehlelwe yinto eyenzeke kwisizini egqithileyo.
Ilwele ukusinda ezembeni ngokwaneleyo.
Ngoku sifuna iqokelele amanqaku, yilo nto ebalulekileyo kuthi,” utshilo uLarsen onikwe uxanduva lokuqinisekisa okokuba iChippa ifumana indawo kwiTop 8 xa kuphela isizini ka2019/20.
Imidlalo yePSL
NgoMgqibelo: Golden Arrows vs Chippa United @Sugar Ray Xulu Stadium, 15:00; Black Leopards vs Highlands Park @Thohoyandou Stadium, 15:00, Kaizer Chiefs vs SuperSport United @FNB Stadium, 18:00
NgeCawe: Baroka FC vs Bloemfontein Celtic @Peter Mokaba Stadium, 15:00; Stellenbosch vs Maritzburg United @Cape Town Stadium, 15:00
Kuvulwe isikolo esixabisa iR106-million KwaMaxhama