Ayifikanga igalelekile imini yedabi lamaqela amakakhulu eMzantsi Afrika. Amakhosi azakukhusela indebe kwi-Orlando Pirates kwisiqendu sesixhenxe seCarling Black Label Cup ngo’15:00 eFNB Stadium ngoMgqibelo.
Abaququzeleli betumente bathi zonke izinto zime ngonina kwaye bakulungele ukwamkela amashumi alithoba amawaka abalandeli abazakugcwalisa ibala.
Lo ngumdlalo othandwa kakhulu ngabalandeli – kodwa obahlula phakathi abantu boMzantsi Afrika ngenxa yefuthe lala maqela ebholeni.
Nangona abadlali benokuxolelwa kuba imilenze yabo isaqhanile ngenxa yeholide – kodwa ngelishwa labo kufuneka babhityele ebhulukhweni ngoba abalandeli bafuna ukubabona besenza ezibukwayo ebaleni.
Eyona nto eyenza kube mnandi kule tumente kukuba ilawulwa ngabalandeli. Ngabo abachonge abadlali abazakudlala, ikwangabo abenza iinguqu.
Kulindeleke abalandeli bazame ukunika ithuba abadlali abatsha abathengwe ngala maqela ngoba le tumente yosuku kulapho kubonwa khona amandla weqela ngalinye phambi kokuvulwa kwesizini entsha yePSL.
Mabini amadoda awelwe ngumqa esandleni kweli tyeli nazakuthi abengabaqeqeshi bala maqela kulo mdlalo mkhulu. UNkonko Nkoko ngumqeqeshi wePirates, logama uManthulane Aphane ezakube eqeqesha iKaizer Chiefs. Ngenxa yoxinizelelo abaphathi bale tumente bathi baqwalasela indlela abanokufaka ngayo amanye amaqela amabini.
“Ngoku iCarling Black Label ngabaxhasi beziselo bePSL – kodwa asikazi ukuba yintoni ezakwenzeka. Phambi kokuba abaphathi bethu basinike imali kufuneka senze uphando ukuze sifumane indlela enokusebenza ngayo le nto. Kuninzi okwenzekayo kwaye siyayiqonda le nto abalandeli bebhola bayilwelayo,” utshilo uPuso Makume.
Eli lithuba likaSteve Komphela noKjell Jonevret lokonwabisa abalandeli ngokudlala umdlalo onomtsalane nowonwabisayo endaweni yebhola edikidiki eqhelekileyo ngoku xa kudlala la maqela.
IBig Brother Mzansi iza kuqala ngoJanuwari