Likhaya lam lesibini i-Orlando Pirates – Moni

USipho Moni uyayithanda ibhola ekhatywayo, uyayazi kwaye unothando olufanayo lweqela lakhe. Le ndedeba yakuTsolo isixelela ngezinto ezintle ezenziwa ngabalandeli beBhakaniya, iqela alithandayo.

Pedro Mapelo (PM): Siyakwamkela kweli phephandaba. Ngokufutshane ungubani, uhlalaphi?

Sipho Moni (SM): Enkosi, Bhuti! NdinguSipho “Slowpoison” Moni, ndihlala eMdantsane eNU 3. Ndazalelwa kuTsolo, phesha kweNciba. Ndaza kwelaseMonti ngoxelengela umphemfulo nenyama.

PM: Uqale nini ukuba ngumlandeli we-Orlando Pirates, ibhola yona uqale njani ukuyilandela?

SM: Ndiqale ngonyaka ka-1999 ngenxa yosoloko uBhuti wam endiqhubela ebholeni kananjalo endifundisa ukuyidlala.

PM: Kunjani ukuba ngumlandeli weBhakaniya?

SM: Eishh!! Bhuti wam, andazi ukuba ndingayibeka njani. Kuvele kuthi mandikhale xa ndifika kulo mbuzo, ndingatsho ukuthi Likhaya lam lesibini i-Orlando Pirates.

PM: Kubaluleke ngantoni ukuba yinxalenye yesebe leqela lakho?

SM: Mandiqale ndithi ukuba awuyonxenye yePirates, uyafana nephepha eliphaphatheka elingazaziyo nokuba lakuwelaphi. Simanyene, sifana nosapho olunye, sithetha into enye siyakhana, siyakhuthazana kwaye siyancedana.

PM: Njengokuba izinto zingahambanga kakuhle kule sizini, ingaba uziva njani?

SM: Yah! Kona akumandanga kodwa awukwazi ukugqiba ngomthi ungekavelisi ziqhamo. Lona ithemba likhona.

PM: Oyena mdlali umthandayo ngubani, ngokuba kutheni?

SM: Ey!, Bhuti wam. Andifuni kuxoka, abadlali ndingathi ndibathanda bonke ngokulinganayo ngoba baseGazini.

PM: Khawusiphe iqela lakho njengomlandeli omkhulu.

SM: Ovono, Jele, Phungwayo, Gcaba, Mahamutsa, Ntshumayelo, Rakhale, Sarr, Ndoro, Myeni, Memela

PM: Yintoni eyona nto ucinga ukuba ibethe iPirates kule sizini?

SM: Mhmm…akungaba iPirates ibethakele kule sizini, nto nje zizilingo bekufanele idlule kuzo ukuze ifunde lukulu emva koko ingapinde ilingeke kwangesi silingo sinye.

PM: Siyabulela ngexesha lakho Slowpoison..

SM: Enkosi Bhuti wam ngexesha lakho, ukuba ibingeyontando yakho ukuba ndibenodliwano ndlebe neI’solezwe lesiXhosa, ibiyintando kaThixo.