Ivulwa ngokusesikweni imidlalo yePSL kule mpelaveki. Abalandeli beChippa United bazibuza umbuzo othi: Iyakuqhuba njani na iChippa United kule isizini?
Imibuzo enjalo ivela ngenxa yokungaqhubi kakuhle kwayo iChippa kwiisizini ezigqithileyo esinde ngolambisa ezembeni kuzo zombini.
Akungaba akukho mizamo emihle eyenziwa ngusihlalo weChippa – uSiviwe Mpengesi.
Ingxaki ebonakalayo kukuthenga abadlali aphinde abathengise.
Ukuthengisa abadlali nokuqesha abaqeqeshi abatsha oko kwenza kungabikho zinzo kakuhle kwiqela.
Kwisizini ezidlulileyo, iChippa ithengise abadlali bayo abaphambili; yona yashiyeka isokola.
Ziimpazamo ezo ezenziwa yiChippa eziyisokolisayo kakhulu. Ngoku lo nto yenza kungacaci eyona nto yenziwayo yiChippa njengokuba amanye amaqela efuna ukuphumelela iindebe afumane neendawo eziphezulu kwiPSL.
Ubuyile uDan Malesela njengomqeqeshi weqela kule sizini entsha.
Kwangaxeshanye, iChippa ityikitye abadlali abangaphaya kweshumi.
Into encomekayo kukuba uninzi ngabadlali abatsha ngokweminyaka. Lo nto ithethe ukuthi kwakhiwa ikamva.
“Sifumene abadlali abazimisele ukulinceda iqela,” yatsho iChippa ngethuba ibhengeza abadlali abatsha kwinyanga ephelileyo.
Inika ithemba lo nto futhi ukubakho kwabadlali abafana noThabo Ntethe osuka kwiMamelodi Sundowns, uDaine Klate noJabulani Shongwe ziindaba ezimnandi ngoba kuza kuliqinisa iqela.
Njengokuba iChippa United idibana neBloemfontein Celtic kumdlalo wayo wokuqala eDr Molemela Stadium ngeCawe, kunyanzelekile ukuba iqokelele amanqaku zisuka ukuze iphephe okwenzekileyo kwiisizini ezidlulileyo.
Iyaqala iChippa United ukuqina ngolu hlobo noxa ithengise abona badlali ebixhathise ngabo. Lifikile ixesha lokuba ilwele indawo yayo kwiTop 8 okanye kubekho indebe ezayo.
NgoMgqibelo: Mamelodi Sundowns vs Kaizer Chiefs @Loftus Versfeld, 15:00; Bidvest Wits vs Free State Stars @Bidvest Stadium, 18:00; Cape Town City vs SuperSport United @Cape Town Stadium, 18:00; Black Leopards vs Polokwane City @Peter Mokaba Stadium, 18:00; Orlando Pirates vs Highlands Park @Orlando Stadium, 20:15; AmaZulu FC vs Baroka FC @King Zwelithini Stadium, 20:15.
NgeCawe: Maritzburg United vs Golden Arrows @Harry Gwala Stadium, 15:00; Bloemfontein Celtic vs Chippa United @Molemela Stadium, 15:00.
Liyoyikisa izinga lokunyamalala kwamadoda eGqeberha!