Ndiyayazi into efunwa ngabalandeli bePirates, utsho uRiveiro

Umqeqeshi we-Orlando Pirates omtsha, uJose Riveiro, uthathe umzuzu wachazela iintatheli ngokulindelekileyo kuye neqela lakhe emva komdlalo obusekuqaleni kwale veki. Le ndedeba yaseSpain ifike ekupheleni kwesizini egqithileyo izokuthatha indawo kaMandla Ncikazi noFadlu Davids abebeqeqesha iPirates ngokubambisana kwisizini egqithileyo. Ethetha emva kokuba iPirates ibambene ngegowuli elinye neStellenboch emdlalweni weDStv Premiership obutaka iintlantsi eDaine Craven Stadium, uRiveiro uthe akukho mqathango wokuphumelela indebe awunikiweyo ngabaphathi bakhe ngethuba enikwa umsebenzi – kodwa uyayazi into efunwa ngabalandeli.

Nangona ikhe yaqengqeleka iminyaka engaphaya kwemihlanu ingefumananga ndebe iPirates – kodwa ikhe yayiphakamisa indebe yeMTN8 ngonyaka ka-2020 kusekho uJosef Zinnbauer waseJamani ohambe kunyaka ophelileyo isizini isaqala. Kunyaka ophelileyo iphoswe kancinci yeCAF Confederation Cup emva kokubethwa emdlalweni wokugqibela. “Hayi, zange kuthiwe mandiphumelele iindebe ezikunga – kodwa ke ndiqeqesha iPirates. Ndiyazi kakuhle into elindelwe ngabantu nezinto abazinqwenelayo. Sisebenzela ezo zinto kanye. Asinqweneli nto. Yinto yabantu abazalwayo leyo. Sisebenzela ukwenza izinto zenzeke. Sifuna ukunika abalandeli bePirates into ekhethekileyo kule sizini,” utshilo uRiveiro.

Ezimnyama ziyiqale kakuhle isizini ngokubetha iSwallows ngegowuli elinye. Azivumanga izinto kodwa eStellenbosch nangona beziqale zatsazisa igazi. “Ndicinga ukuba iziphumo zomdlalo zisifanele macala ngoba amaqela ebenamaxesha ebenamandla ngawo omabini emdlalweni. Isidlale kakuhle kakhulu isiqingatha sokuqala iStellenbosch. Thina besingekho bukhali phambi kwepali. Siphulukene namathuba amaninzi. Thina sidlale bhetele isiqingatha sesibini,” utshilo uRiveiro. Ngoku ulungiselela ukudibana neChippa United emdlalweni wesithathu wesizini entsha. Kunyanzelekile ilwele amanqaku amathathu iPirates emva kokubuya nelinye ngoLwesithathu. IChippa iya eGoli ifuna shushu ukuphumelela emva kokubethwa yiRoyal AM emdlalweni obungoLwesithathu kule veki.