Oko ebencume izolo ugqirha Danny Jordaan!

Umongameli weSafa, uDanny Jordaan, uchulumance kakhulu emva kwempumelelo ezuzwe nguMzantsi Afrika izolo. IBafana Bafana ivingcele iNigeria enkundleni yayo phambi kokuyibetha ngo’2-0 kumdlalo ohlakulela i-2019 Africa Cup of Nations obuseGodswill Akpabio Stadium ebusuku izolo. Ibikokokuqala uMzantsi Afrika ubetha iSuper Eagles emva kweminyaka elishumi elinesithathu. Ngethuba iBafana Bafana ibetha ilizwe laseNigeria ngo-2004, imikhala yayixhuzulwa nguStuart Baxter – kanti ke nayizolo ibikwanguye oze nempumelelo.

Kusoloko kukho ukuxhokonxana nomlo ongapheliyo phakathi kwabantu balamazwe mabini. Impumelelo yoMzantsi Afrika ibuyisa isithunzi selizwe nanjengoko ukoyisa iNigeria – esenobunganga kwibhola ekhatywayo kwizwekazi le-Afrika – iyinto enkulu. Akakwazanga ukulibamba uncumo uDanny Jordaan namhlanje ngethuba ethetha neentatheli eMonti.

“Aaah! Ibe yimpelaveki emnandi kakhulu le. Impumelelo esiyilinde iminyaka engaphaya kwamashumi amabini eminyaka ide yafika. Siyibethele kowayo iNigeria, sisiqalo esincomekayo kakhulu esi kwiqela lesizwe. Ndizakubamkela ngovuyo – kodwa okubalulekileyo kukuba sineqela elizithembayo ngoku. Simnqwenelela intlahla uStuart Baxter neqela lakhe kwimidlalo yokuzibekela indawo kwiFifa World Cup ka-2018 ne-2019 Africa Cup of Nations,” utshilo uJordaan ebobotheka luncumo.

Lo kaJordaan ebephakathi kwezihandiba ebezizimase umdlalo wamagqibela kankqoyi we-ABC Motsepe obuphakathi kweqela laseKZN (Uthongathi FC) neSuper Eagles yaseFree State ngenjikalanga yanamhlanje eBuffalo City Stadium. UJordaan uvuyisene namaqela anyuselweyo watsho ewanqwenelela okuhle kwaNational First Division. “Uthongathi neSuper Eagles zidlale kakuhle kakhulu. Amaqela abejongwe kakhulu afana ne-Acornbush ne-EC Bees oyisakele nangona edlale kakuhle kwimidlalo yeNedbank Cup,” utshilo umongameli weSafa.

“Iqela eliphumeleleyo ligoduka nesigidi serandi (R1-million) elizakuthi lilungislele ngayo inqanaba elingasentla. Kwakhona sithumela amaqela amabini kwiNFD, kwaye ukuba uyajonga amaqela aphuma apha (kwiMotsepe League), afana neBaroka FC, Highlands Park aphezulu ngoku noMthatha Bucks uqhube kakuhle kwinqanaba elingasentla. Siwanqwenelele okuhle kodwa la maqela. Intsebenziswano yethu neMoptsepe Foundation ivelise abanye abadlali abatsha. Ngoku into entsha esiyenzileyo kukuchonga iqela labadlali kule tumente elizakuthi lidlale neMamelodi Sundowns. Abadlali abaphuma apha bazakufumana ithuba lokudlala neentshatsheli ze-Afrika (iMamelodi Sundowns) kwaye sicele abaqeqeshi ukuba bajonge abadlali abanokuthi badlale nakwiChan,” utshilo uJordaan.