Ibiluncumo lodwa kubadlali nakubaqeqeshi bamaqela emva kokuphehlelelwa kwetumente yombhoxo entsha emsithweni obubanjelwe eBuffalo Park, eMonti, izolo. Ngokutsho kwabaququzeleli, iBrutten Top 10 iza kuba yitumente esemgangathweni ophezulu ephantsi ephantsi kweBorder Rugby Union. Kudityaniswe amaqela akwinqanaba eliphezulu nakwelisezantsi ukuze wonke umntu afumane ithuba lokulwela indawo ephambili. Ngamaqela alishumi aza kuthatha inxaxheba kulo nyaka.
Amaqela aza kulwela ukufumana ibhaso lokuqala elingamashumi amathathu amawaka erandi (R30 000) kwitumente eza kuqala kwiveki ezayo. Ohlulwe kabini amaqela aza kudlala kwiBrutten Rugby Tournament exhaswa nguTekkie Town owaziwayo ngokuthengisa iimpahla zemidlalo noFirst National Bank (FNB) owaziwayo ngokuxhasa umbhoxo eMzantsi Afrika.
KuPool A: EL Police, University of Fort Hare, Walter Sisulu University, United Brothers nLovedale. Umi kanje yena uPool B: Swallows, Komga, Young Leopards, FB United neBCM. Zonke izithethi emsithweni zikuqhwabele izandla ukusungulwa kwetumente entsha kwiBorder ngoba yindawo ethathwa njengekhaya lombhoxo.
Abambhoxo kwiBorder balenza elo bango kuba beqhayisa ngokuvelisa abadlali beSpringbok abafana noMakazole Mapimpi ophumelele iNdebe yeHlabathi yombhoxo izihlandlo ezibini. Umququzeleli weBrutten Top 10, uSindile Mayende, uvakalise uchulumanco olukhulu.
“Namhlanje siphehlelele itumente yokuqala ngqa kwiBorder ekuthiwa yiBrutten 10. Okuhle ngale tumente entsha kukuba idibanisa amaqela akwinqanaba eliphezulu nelisezantsi. Sisungule le tumente kuba sifuna ukuvuselela umbhoxo apha kwiBorder.
“Le yindawo eyayibalasele embhoxweni kudala. Sifuna ukubuyisa ezo ntsuku. Abadlali beSpringbok abafana noMakazole Mapimpi noLukhanyo Am baqale kula maqela walapha ukudlala. Sibilela uTekkie Town, uFNB noCastle Lager ngokusixhasa,” utshilo uMayende.
Ukuwa kwaMapolisa, kuvula indlela yeWSU All Blacks!