Kungekudala, imidlalo yebhola yomnyazi ekwinqanaba eliphezulu eMzantsi Afrika iza kubuyela emabaleni kwakhona. Oku kubhengezwe nguMongameli weNetball South Africa, uNksz. uCecilia Molokwane, kwindibano nabeendaba eGoli kwiveki ephelileyo. Imidlalo yeTelkom Netball League iza kuqala ngomhla wamashumi amabini anesixhenxe kule nyanga kaTshazimpuzi, umhla wenkululeko, eNgoako Ramahlodi Sports Complex, eSeshego, kwiphondo laseLimpopo. Njengesiqhelo, amaqela omnyazi aza kwahlulwa kabini: kukho iNetball League A noNetball League B.
Inkampani enkulu yezonxibelelwano, uTelkom, iphinde yazibophelela ebholeni yomnyazi – kanti ikwa yiyo engumxhasi omkhulu wetumente yehlabathi yomnyazi (Netball World Cup) eza kudlalelwa eKapa kwinyanga yeKhala kulo nyaka. Njengesiqhelo, abaphathi bebhola yomnyazi bathe imidlalo yeTelkom Netball League iza kudlalelwa emaphondweni amabini: eLimpopo naseGauteng ngokulandelelana.
“Sichulumancile kukuzibophelela kukaTelkom kuphuhliso lwezimidlalo. Ukuxhasa kwakhe iNetball League eminye iminyaka kubonisa ukunikela kwakhe kwezemidlalo. Siyayibulela ke lo nto kakhulu singumbutho olawula ibhola yomnyazi,” utshilo uMolokwane ethetha neentatheli kutshanje. Njengokuba isigaba sokuqala sesizini siza kudlalela eSeshego, isigaba sesibini sona siza kudlalela eHeartfelt Arena, ePitoli.
Kodwa isizini iya kuphinde iyokusongwa eLimpopo ngomhla wokuqala kaCanzibe. Isikhulu sikaTelkom, uNksz. uGugu Mthembu, uthe lo ngunyana abazingca ngawo kakhulu njengabaxhasi bebhola yomnyazi. “Sifuna iTelkom Netball League iqaqambise italente yaseMzantsi Afrika. Ngokwenza kwethu kanje, sizama ukunika amandla abantu baseMzantsi Afrika xa bedibana nobunzima bobom. Iza kunika iqela lesizwe, iSPAR Proteas, abadlali nabaqeqeshi abaza kumela ilizwe kwitumente yehlabathi iTelkom Netball League,” utshilo uMthembu. Okuhle kukuba iEastern Cape Aloes iza kube idlala kwinqanaba looxholovane kule isizini emva kokogqugqisa kwiNetball League B.
Ngamaziko olwazi kuphela anegunya lokuvelisa ulwazi?