‘Sifuna ukuyiphumelela iVarsity Shield’

Iintshatsheli eBaffulo City, iWSU All Blacks, zizibona njengelinye lamaqela amabini aya kwiVarsity Cup ngo-2019 esuka kwiVarsity Shield.

Eli qela, elabethwa yiYunivesithi yaseNtshona Koloni apha ku-2017, lifunge lamunca iintupha lisithi lizakuwatyumza onke amaqela adlala kwiVarsity Shield.

Umqeqeshi we-All Blacks, uSipho Metula, uthi uqinisekile ukuba bazakunyukela phezulu kwiVarsity Cup emva kwemidlalo yeVarsity Shield ka-2018.

“Sinawo amava kule tumente ngoba * -2018 uzakuba ngunyaka wethu wesibini sikuyo. Siwabonile ukuba adlala njani la maqela, ndiqinisekile ukuba sizakunyukela kwiVarsity Cup ngo-2019,” utshilo uMetula.

Ukudlalisa abadlali abaneminyaka engaphezulu kwamashumi amabini anesibini okuchaseneyo nemigaqo-siseko yeVarsity Shield, yenye yeempazamo abazenzayo eyabangela ukuba umdlalo wabo owandulela owokugqibela bayowudlalela eKapa.

“Soxuthelwa amanqaku alishumi emva kokuba safunyanwa sophule umgaqo-siseko wetumente ongawavumeliyo amaqela athatha inxaxheba ukuba adlalise abadlali abakwibakala elithile ngeminyaka. Asizukuphinda sizenze iimpazamo ezinjalo,” utshilo uMetula.

Ukapteni weli qela, uPhumlani Blaauw, owenza unyaka wesibini kwizifundo zePublic Management kule Yunivesithi, uyangqinelana nomqeqeshi wakhe.

“Sifunde kakhulu kwiimpazamo ezenzeke kulo nyaka yaye siqinisekile ukuba siyaya kwiVasity Cup kunyaka ka-2019”, utshilo uBlaauw.

Indebe yeVarsity Shield inamaqela asibhozo, idlalwa ziiYunivesity zodwa kwaye kufuneka abadlali babeneminyaka elishumi elinesibhozo ukuya kumashumi amabini anesibini.

Iqela eliphumelele indebe linyukela kwiVasity Cup. IWSU All Blacks, ziqubisana ne-UWC kumdlalo wokuvula e-University of Western Cape Stadium ngomhla weshumi elinesithoba kweyoMdumba ngo-2018.

isibhalo@inl.co.za