Omnye wabaqeqeshi beMamelodi Sundowns, uRhulani Mokwena, uthembise abalandeli beqela lakhe ngelithi liza kulwela eyona ntaka enkulu kwisizini ezayo. Oku kuthethwe nguMokwena emva kokuba iSundowns iphakamise indebe yeDStv Premiership ekhatshwe lishumi elinesihlanu lonke lezigid zerandi (R15-million) kwiveki ephelileyo. Abafana beSitayile bavale isizini ngokugqezula ngeCape Town City abayivuthulule ngamagowuli amathathu eqandeni. UPeter Shalulile, ofumene iwonga lomdlali wonyaka nelovotelwe ngabanye abadlali, ubuye namagowuli amabini laze elinye lafakwa nguLyle Lakay emdlalweni obuseLoftus Stadium. Ibikokwesine iSundowns iphumelela eyona ndebe ibalulekileyo ebholeni yaseMzantsi Afrika izihlandlo zilandelelana.
Iyancomeka indlela eqhube ngayo iMamelodi Sundowns phantsi kukaManqoba Mngqithi, uRhulani Mokwena noSteve Komphela olisekela. Emidlalweni engamashumi amathathu, iDowns iphumelele ishumi elinethoba, idlale ntanganye emidlalweni elishumi yaze yabethwa emdlalweni omnye qha. Kuloo midlalo, Amasandawana aqokelele amashumi amathandathu anesixhenxe amanqaku. Ethetha emva kokunikwa imbasa yegolide, uMokwena uthe: “Siyivale kakuhle kakhulu isizini ngoba abadlali beze emdlalweni (wokugqibela) iingqondo zabo zizinzile.” UMokwena uthethe ngeenguqu abazenzileyo emva kokuthatha iintambo kuPitso “Jingles” Mosimane – owaya kwi-Al Ahly isizini isaqala kunyaka ophelileyo.
“Ndibaqhwabela izandla abadlali bethu ngoba sidlale kakuhle kakhulu kule sizini. Siyitshintshile kancinci indlela esidlala ngayo kule sizini. Iyasichulumancisa inkxaso esiyifumene kuMongameni, kusihlalo nakubalandeli beSundowns. Inkxaso esiyinikiweyo yiyo esinike amandla okuphumelela indebe kusashiyeke imidlalo emithathu,” utshilo uMokwena. Emva kokukhutshwa yi-Al Ahly, kulindeleke iSundowns ilwele ukuphumelela iCAF Champions eza kuya kuyo naMaZulu kwityeli elilandelayo. Lo nto ithethe ukuthi isazimisele nokukhusela ubunganga bawo ebholeni yaseMzantsi Afrika. Nangona uShalulile noThemba Zwane bezithaphulele amawanga wePSL – kodwa ukunganikwa kukaMngqithi noMokwena iwonga lomqeqeshi wonyaka lidale iintetha kumakhasi onxibelelwa afana noFacebook ngoba akukho sizathu esivakalayo esibangele kukhethwe uBenni McCarthy ovale isizini kwindawo yesibini.
Baphume bebokoboko enkundleni abanchase uMandla uNtlanganiso