Usihlalo
wePremier Soccer League, uGqirha Irvin Khoza, uwubhengezile umhla eza kuqala
ngawo isizini entsha ka-2020/21 nomhla ekuza kuthengwa ngawo abadlali abatsha
ngamaqela. UGqirha Khoza wenze izibhengezo xeshikweni ethetha neentatheli
kwindibano ebibanjelwe eGoli kwiphondo laseGauteng namhlanje emini. Ngomhla wesibhozo
kwinyanga yeDwarha kuza kuqala isizini yePSL entsha kraca ka-2020/21 – kodwa emva
kokuba kusongwe le ka-2019/20 iqhubekayo. Kanti ngomhla wamashumi amabini
anesibini kwinyanga yoMsintsi, onke amaqela adlala kwiPSL aza kunikwa ithuba
lokuqala ukuthenga nokuthengisa abadlali kude kube ngumhla weshumi
elinesixhenxe kwinyanga yeDwarha. Njengokuba kuye kwabakho iinguqu ngenxa
yesiphithiphithi esenziwe yiKhovithi-19 (
eswantsulise intlalo yoluntu noqoqosho lwehlabathi lonke ukusukela ekupheleni
konyaka ophelileyo, iPSL igqibe kwelokuba inike amaqela elinye ithuba
lokuthenga abadlali kunyaka ozayo (2021) ukusukela kwinyanga yoMdumba ukuya
eKwindla.
Isizini yePSL
iqhele ukuqala kwinyanga yeThupha – kodwa kulindeleke izinto zihlale
zipetyekile okwethutyana kude kubekho iyeza lokunyanga ikhorona enyanzele
ukwenziwa ngendlela engaqhelekanga ebholeni ekhatywayo engasabukelwayo
ngabalandeli emabaleni. “Ukuhlalisa bonke abadlali bamaqela ndawonye yinto
ebiza kakhulu ngokwasezimalini. Akukho nto esinokuyenza ke okwangoku ngoba
nguRhulumente olawula indlela izinto ezenzeka ngayo ngeli thuba lekhorona. Siza
kuhlala siyibeke esweni imeko yentlalo nangoko (kwinyanga yoMsintsi) kwaye siza
kuqweba iindlela ezintsha zokumelana nayo phambi kokuqhubela phambili nemidlalo
yethu yesizini entsha,” utshilo uGqirha Khoza. Ngomso kuqala imidlalo kwakhona
emva kokunqumama isithuba seenyanga ezine zonke ngenxa yekhorona. Emidlalweni
emibini yeNedbank Cup, iBloemfontein Celtic iza kuthathana neBaroka FC. Kanti
yona iMamelodi Sundowns iza kwamkela iBidvest Wits. Yomibini imidlalo iza
kudlalelwa e-Orlando Stadium.
Liyoyikisa izinga lokunyamalala kwamadoda eGqeberha!