Umqeqeshi wamaBhokobhoko * -Allister Coetzee, uthi wonwabile kukuba amaqela amathandathu adlala iSuper Rugby kweli, abonakalise ukuba azakuncedisa kwimpumelelo yeSpringboks.
Lo mqeqeshi undwendwelke onke amaqela oMzantsi Afrika adlala kwiSuper Rugby kwezi veki zimbalwa zidlulileyo.
Kwiminyaka edlulileyo bebungekho obu budlelwane, phakathi komqeqeshi weBoks nabaphathi bamaqela eSuper Rugby. Abaphathi bebebeka amaqela abo phambi kwemidlalo yesizwe.
UCoetzee yena wayebakhulula abadlali abafana noDuane Vermeulen xa kufikelela kwimicimbi yesizwe ngelixa esengumqeqeshi kwiStormers. Ngoku izinto kubonakala ngathi zicalanye kumalungiselelo emidlalo emithathu yovavanyo phakathi koMzantsi Afrika ne-Ireland kule nyanga izayo.
Abadlali abaphezulu abafana noTendai Mtawarira noPeter-Steph du Toit bobabini basaphumle, emva kokuba bedlale imidlalo emihlanu elandelelanayo yeSuper Rugby.
Into efunwa yiSARU embhoxweni kukuba amaqela asebenzise ukuhlasela ngamandla kwimidlalo yawo ngoku.
Le ndlela intsha yokudlala sele eqalile ukuyisebenzisa amaqela amaninzi kwiSuper Rugby, iiLions zikwazile ukuyibonakalisa lo nto kwimidlalo yazo edlulileyo.
Amaqela aquka iStormers, iiBulls neSharks nawo asebenzela ukufikelela kweli qondo lokudlala umbhoxo.
“Ndikholelwa ukuba kubalulekile ukuba nobudlelwane obuphilileyo phakathi kwabalawuli beSpringboks, abaqeqeshi kunye nabadlali bamaqela eSuper Rugby.
“Ngelixa sindwendwele la maqela njengeSARU ndiwacacisele indlela endenza ngayo izinto kwaye ndiwaxelele ukuba kulindeleke ntoni na kumdlali othe watyunjwa ukuba adlalele iSpringboks,” utshilo uCoetzee kwingxelo ekhutshwe ngoLwesibini.
“Eyona nto indinika umdla kukubona indlela abadlali abalangazelela ngayo ukudlala kwiSpringboks.”
“Njengokuba ndiwandwendwele la maqela ndingathanda ukundwendwela imibutho yombhoxo yamaphondo eli loMzantsi Afrika. Ndikholelwa ukuba umdlali ngamnye, nakweli kufuneka aqhubeke nephupha lokudlala kwiSpringboks,” uvale ngokutsho uCoetzee.
Luthatha lubeka usapho obeluthenjiswe ngoncedo kumngcwabo womzali ogetyengiweyo!