Emva kokuphela kwesizini yePSL ka’’2016/17, abalandeli bebhola eMpuma Koloni baye bazibuza umbuzo: ingaba uzakuhlala na uDan Malesela kwiChippa United?
IChippa United isinde cebeshu ezembeni kwisizini edlulileyo emva kokungaqhubi kakuhle kwimidlalo yePSL kwizigaba zozibini zesizini.
Ukungaqhubi kwayo kakuhle kwakhokelela ekunqunyanyisweni kukaDan Malesela ngabaphathi beChippa United.
Indawo yakhe yathathwa nguMbuyiselo Sambu – isekela mqeqeshi – kodwa kwathi lakubethwa iqela kwimidlalo emithathu ilandelelana, wabuyiswa uMalesela. Ekubuyeni kwakhe iiChilli Boys zabetha iSuperSport United ngo’3-0 eBhayi, zaze zabambene neFree State Stars ngeqanda kumdlalo wokugqibela.
Ngokwengxelo yephephandaba laseGoli, izikhulu zeChippa United zigqibe kwelokuba ahlale umqeqeshi emva kokuyisindisa ezembeni.
“Umqeqeshi uneminyaka emithathu yesivumelwano neqela, kwisizini ezayo uyabuya. Ungumqeqeshi wethu. Sesithethile naye ngemiba emininzi equka indlela yokukhangela abadlali abatsha,” utshilo uLukhanyo Mzinzi.
Ukugqwidiza kweChippa ekuzeni kuphela kwesizini kudale unxunguphalo kakhulu kubalandeli bebhola eMpuma Koloni – kodwa baye bakhululeka emva kokulwa kwayo kwimidlalo yokugqibela.
Nangona bekukho elo xhala – kodwa iChippa yenze inkqubela kwiNedbank Cup nakwiMTN 8 okokuqala ukusukela ngo’2010 eyafika ngaye kwiPSL. Kulindeleke abadlali babuyele enkomeni kwinyanga yeKhala.
pedro.mapelo@inl.co.za
IBig Brother Mzansi iza kuqala ngoJanuwari