Akawuvali umlomo umqeqeshi weFrance ngenxa yemincili emva kokuba ithe yazibekela indawo kumdlalo wokugqibela weNdebe yeHlabathi ka2018 esingathwe lilizwe laseRussia.
IFrance iya kumdlalo wamagqibela kankqoyi nelizwe eliphumeleleyo phakathi kweCroatia neNgilane.
IBelgium yeyona idlale umdlalo ongcono nakubeni ingakwazanga ukuwasebenzisa amathuba wayo kumdlalo obubanjelwe eSaint Petersburg Stadium ngokuhlwa kwangoLwesibini.
UDidier Deschamps ubancomile abadlali bakhe watsho ebachaza njengabantu abaye emdlalweni bekwisimo sengqondo esihle.
UDeschamps usecicini lokuzenzela imbali nelizwe lakhe ukuba izinto zibahambela kakuhle kumdlalo wokugqibela ngeCawe kwisixeko saseMoscow.
Kaloku kumqeqeshi impumelelo iya kuthetha ukuthi ukwazile ukuphumelela iNdebe yeHlabathi kabini – wayeyinkokeli yeFrance ngo1998, unyaka eyaphumelela ngawo eyona ndebe inexabiso kwibhola ekhatywayo.
IBelgium eqeqeshwa nguRoberto Martinez yeyona ibifanele ukuya kumdlalo wokugqibela ukuba bekujongwa umdlalo omhle – kodwa ngelishwa layo, iza kudlalela indawo yesithathu ngoba ayikwazanga ukufaka amagowuli.
Nangona iFrance ineziqwayi zabadlali abavunyiweyo kwihlabathi abaquka uPaul Pogba, uAntoine Griezmann, uSamuel Umtiti noKylian Mbappe – ayikwazanga ukudlala umdlalo onomtsalane ebantwini njengeBelgium neCroatia – kodwa ke kuyabonakala ukuba iye eRussia izimisele ukwenza eyona nto ibalulekileyo ebaleni: ukuphumelela nokuzama ukulungisa okwenzeke kwiminyaka emibini edlulileyo.
“Uyamangalisa umsebenzi owenziwe ngabadlali. Ndonwabe kakhulu ngoba babonakalise ukomelela emdlalweni. Siya kumdlalo wokugqibela sifuna ukuphumelela ngoba asikayilibali into eyenzeka ngo2016,” utshilo uDeschamps.
Abantu baseFrance basenesingqukru ngoba ilizwe labo labethelwa ekhaya yiPortugal kumdlalo wetumente yamazwe aseYurophu.
Ngoku iFrance inomdlalo omnye enokucima ngawo yonke lo nto ukuba ikwazile ukuphumelela.
Obezenza umntu othengisa izindlu neemoto ugwetywe iminyaka eyi-22