Iza kuxakekiswa ngamanqindi inyanga yoMsintsi kwiphondo leMpuma Koloni. Iimbethimanqindi ezikudidi oluphezulu zaseMonti naseMthatha zibuyela eqongeni.
IRumble Promotions iququzelela eyona tumente ejongwe kakhulu ngabantu elizweni engomhla wamashumi amabini anesithoba eOrient Theatre. Umlo ophambili uphakathi kuka-Azinga Fuzile noShavkat Rakhimov waseRussia. Ezi mbethimanqindi ziza kube zisilwelwa ithuba lokucela umngeni intshatsheli ye-IBF kwihlabathi uTevin Farmer waseMelika.
UPhila Mpontshane uza kukhusela intshinga yoMzantsi Afrika kuKhanyile Bulana. Yomibini imilo ikudidi lweJunior Lightweight. Yena uAyabonga Sonjica uza kucela umngeni intshatsheli yoMzantsi Afrika yodidi lweJunior Featherweight, uInnocent Mantengu.
USiphosethu Mvula uthwaliswe uxanduva lokuphindezela oogxa bakhe baseMonti kuMichael Mokoena osele eneengxwelerha ezimbini eMonti kulo nyaka ezinguLusanda Komanisi noPhumelela Sobahle.
Ngelixa uLuyanda Ntwanambi waseZiphunzane noFikile Mlonyeni waseMdantsane kulindeleke ukuba babohlule kubini abalandeli baseMonti kumlo wentshinga yeABU wodidi lweMpukane.
URonald Malindi uza kunika uMichael Daries ithuba lokulwela intshinga yoMzantsi Afrika.
Kuvulwe isikolo esixabisa iR106-million KwaMaxhama