UGabadinho Mhango unamazwi ambalwa awabhekisa kwiKaizer Chiefs

By
Pedro Mapelo
-
Gabadinho Mhango of Orlando Pirates challenged by Samir Nurkovic and Khama Billiat of Kaizer Chiefs during the 2019 Telkom Knockout quarter final match between Kaizer Chiefs and Orlando Pirates at Moses Mabhida Stadium, Pietermaritzburg, on 2 November 2019 Samuel Shivambu/BackpagePix

Ifolosi ehamba
phambili ngokufaka amagowuli kwi-Absa Premiership, uGabadinho Mhango, ithi ayinalo
nelincinci ixhala njengokuba iqela layo liza kuqibisana neKaizer Chiefs
emdlalweni onzima ngempelaveki. UMhango ukuthethe oku kwinkqubo yezemidlalo
yesikhululo sosasazo sikaSABC esizinze eGoli, iSAFM. Emalanga ngecala emva
kwentsimbi yesithathu ngoMgqibelo, i-Orlando Pirates iza kwamkela iChiefs ephantsi
koxinizelelo kowona mdlalo omkhulu kule sizini eFNB Stadium ekulindeleke
igcwale ime ngeembambo. Amatikiti akumawaka akumashumi alithoba athengiswa
aphela kwisithuba seeveki ezimbini ezidlulileyo. UMhango ngoyena mdlali ohamba
phambili emva kokufaka amagowuli alishumi alinane emidlalweni engamashumi
amabini ananye edlalwe yiPirates kule sizini ka-2019/20. Kulindeleke ibe nguye
umdlali ethembele kuye iPirates emdlalweni ongoMgqibelo ngenxa yendlela adlala
kakuhle ngayo.

“Andinanto
endiyoyikayo kwiKaizer Chiefs ngoba kuza kube kudlalwa ebaleni. Into
ebalulekileyo kuthi siliqela, kufuneka silwele igama lethu nabalandeli bethu. Asikwazi
ukuthetha kakhulu ngokunokwenziwa yiChiefs. Kufuneka sigxile kakhulu kwizinto
esinokuzenza thina (siyiPirates) sonwabele nomdlalo. Siya emdlalweni
sizithembile ngoba siliqela elidlala kakuhle. Andazi kwenzeka ntoni kwamanye
amaqela; into endiyaziyo kukuba sonwabile futhi siwujonge ngamehlo abomvu
umdlalo wangoMgqibelo,” utshilo uMhango ethetha kwiSAFM. Nangona abaqeqeshi
bePirates bengafuni nokuva xa kusithiwa iqela labo linalo ithuba lokulwela
indebe – kodwa impumelelo ingavuselela ithemba labo lokulwela indebe ye-Absa
Premiership. Ezimnyama zithe ngcu kwindawo yesithathu emva kokuqokelela
amashumi amathathu anethoba amanqaku – yona iChiefs ihleli phezulu kwiPSL.

 

 

 

 

RELATED ARTICLESMORE FROM AUTHOR