UHugo Broos ufuna aBafana Bafana badlale namazwe amakhulu

By
Pedro Mapelo
-

UTeboho Mokoena, uSaddam Make, uHugo Broos, uDr Danny Jordaan noMama Joy kunyaka ophelileyo eGoli. Umfanekiso: Sydney Mahlangu/BackpagePix

Umqeqeshi weqela lesizwe lebhola ekhatywayo, uHugo Broos, ukruqulwe ngamazwe amancinci ngoku ufuna ooxholovane. Ekuqaleni kweveki, okaBroos ukuthethe oku emva kokubhengeza amagama wabadlali aza kulungiselela ngabo imidlalo emibini yobuhlobo phambi kokuphela kwale nyanga yoKwindla. ABafana Bafana baza kudibana enkampini kwiveki ezayo eGoli – apho baza kulungiselela ukudibana neGuinea ngoLwesihlanu kwiveki ezayo eBelgium. Emva koko, aBafana Bafana baza kuswantsulisana neentshatsheli zehlabathi, iFrance, ngomhla wamashumi amabini anethoba.

UMzantsi Afrika uza kudlala okokuqala ukusukela oko wabethwa yiGhana ngendlela engacacanga uzama indlela yokuya kwiNdebe yeHlabathi (2022 Fifa World Cup) kwinyanga yeNkanga kunyaka ophelileyo. Imidlalo yobuhlobo iza kulola abadlali phambi kokuya kwimidlalo ehlakulela imidlalo ye-Africa Cup of Nations. UBroos ufike kunyaka ophelileyo emva kokuba aBafana Bafana bengazange bakwazi ukuzibekela indawo kwi-2022 Africa Cup of Nations (Afcon) ebibanjelwe eCameroon. Noxa naye ebezamile ukuqokelela amanqaku abenokusa iqela eQatar kwitumente yehlabathi – kodwa iqela lakhe loyiswa yiGhana ngomzuzu wokugqibela. Ngoku umqeqeshi uthi kwanele ngamaqela amancinci.

“Kufanele sidlale namaqela amakhulu ngoku,” utshilo uBroos. “Siza kudibana neentshatsheli zehlabathi neGuinea enabadlali abadlali eYurophu nesuka kwi-Afcon. Kuninzi esiza kufunda nokuba sibethiwe. Imidlalo iza kusinceda xa sijonga abadlali bethu kunokubajonga sidlala neBotswana. Sifuna ukujonga abadlali esiza kuzama ngabo indlela eya kwi-Afcon elandelayo. Kunyanzelekile sizilungiselele ngokupheleleyo ngoba sifuna ukuya e-Ivory Coast,” utshilo uBroos. Akukho zinto zothusayo kwiqela lakhe ngaphandle kokuba eshiye uVictor Letsoalo athe umdlalo wakhe wehlile emva kokuqala kakuhle isizini yeDStv Premiership kunyaka ophelileyo.

Oonozinti: Ronwen Williams, Veli Mothwa, Bruce Bvuma.

Abadlali basemva: Nyiko Mobbie, Khuliso Mudau, Terrence Mashego, Lyle Lakay, Rushine De Reuck, Siyanda Xulu, Athenkosi Mcaba, Nkosinathi Sibisi, Bandile Shandu

Esiswini: Mothobi Mvala, Teboho Mokoena, Goodman Mosele, Thabang Monare, Ethan Brooks, Keagan Dolly.

Iifolosi: Lyle Foster, Bongokuhle Hlongwane, Evidence Makgopa, Fagrie Lakay, Percy Tau.

RELATED ARTICLESMORE FROM AUTHOR