Usodolophu weNelson Mandela Bay Metro, ugqirha Danny Jordaan, uthembise iqela lebhola ekhatywayo iChippa United ngenkxaso epheleleyo ukuba iyahlala eBhayi.
Oku kuvakele ngethuba lo masipala ebebambe isihika-hika somsitho wokuthwesa amagqala ezemidlalo nenkcubeko nababesebenza kwiminyaka yoo-1950 noo-1960.
Lo ka Jordaan uthi eli qela lifanele ukuba lihlale kweli laseBhayi, yena nomasipala wakhe bayakuqinisekisa ukuba liphetheke kakuhle. “Ningangxami ngokushiya iBhayi,” utshilo uJordan. Uthe iMpuma Koloni yaziwa njengekhaya lamaqhawe adlale iindima ezahlukeneyo ekuhlaleni.
“Nancama ubomi nexesha lenu nizinikele ekutshintsheni ubomi babanye abantu ngeetalente zenu, niyakuhlala nisisibonelo kubantu abatsha bale ndawo.
Usihlalo weChippa United, uSiviwe Mpengesi, ubulele uJordaan nosihlalo wesebe elijongene nengxowa yalo masipala, uRory Riordaan, ngeengcebiso zabo bekwamkhuthaza ngobunkokeli nangeendlela zokulawula imali, esithi oko kwamncedisa kwimpumelelo yeli qela.
“UJordaan wandibonisa ngobungozi bokusoloko sigxotha, siqesha abaqeqeshi, esithi masihlabe sikhangele xa sisenza oko siqeshe sisebenzisa ubulumko nokuphapha,” utshilo uMpengesi. Ukwathe, kungokunje iqela lakhe ligqiba isizini ephelileyo likwindawo yesithandathu ngenxa yokuxathula amava kuJordaan.
“Silelinye lamaqela ahlonitshwayo kwiPremier Soccer League, sithembisa okukhulu kule sizini, asoze siliphoxe iBhayi neMpuma-Koloni,” utshilo uMpengesi.
Impondo Elisha lonwabisa ngomculo walo eGqobhasi kuloMgqibelo