Amathuba we-Orlando Pirates okuphumelela indebe yeDStv Premiership amfiliba kakhulu, ingakumbi emva kokubethwa emdlalweni ogqithileyo. Ezimnyama zigoduke ziqhwalela emva kokubethwa yiCape Town City emdlalweni obuseCape Town Stadium kwiveki ephelileyo. Ayibaphethanga kakuhle lo nto abalandeli ngoba iPirates iye yakhokela emdlalweni ngegowuli elifakwe nguDeon Hotto – kodwa yavuma ukubethwa yiCape Town City eye emdlalweni ingxwelerhekile emva kokubethwa yiSuperSport United. Noxa iPirates seyiphumelele indebe (MTN8) kule sizini – kodwa indlela edlala ngayo ayikaxolisi konke konke. Ishiywa ngamashumi amabini ananye yiMamelodi Sundowns ebethe iChippa United ngo’2-1 ekuqaleni kwale veki emdlalweni obusePitoli.
Nakubeni izinto ziyihambela kakubi iPirates futhi ingaphandle kwiTop 8 – kodwa umqeqeshi wayo, uJose Riveiro, angathanda xa izibekela indawo kwiCAF Champions League. “Lishumi elinesihlanu lonke lemidlalo eseza kudlalwa. Maninzi amanqaku aseza kudlalelwa. Isiqingatha sesibini sesizini siza kuba nzima – kodwa kumaqela onke, hayi kwiPirates kuphela. Andinaso isizathu esinokubangela ndicinge ukuba ngeke sikwazi ukuqokelela amanqaku emidlalweni ezayo. Angeke kube lula – kodwa sizinimisele ukuya emidlalweni sinenjongo yokuphumelela,” utshilo uRiveiro emva komdlalo eKapa. “Masibone ukuba sakube siphi na xa kuphela isizini. Sizimisele ukuvala isizini sisendaweni entle xa sijonga amanqaku aseza kudlalelwa ngamaqela.
“Indawo esifuna ukuvala isizini sikuyo icacile kuthi kwaye siyakwazi nesikufunayo siyiPirates. Kodwa ke ngamanye amaxesha, izinto ziye zithathe ixesha elide ukuze zenzeke. Siqinisekile ngento esiyenzayo futhi siqinisekile ukuba iPirates iza kunyukela phezulu,” utshilo uRiveiro. Ingxaki yePirates kukungafaki amagowuli emidlalweni. Uyagxekwa umqeqeshi ngokusebenzisa ifolosi enye endaweni yezimbini emidlalweni. Kulindeleke iPirates izame ukuqokelela amanqaku apheleleyo ngempelaveki xa idibana neGolden Arrowns emdlalweni weDStv Premiership oza kube use-Orlando Stadium. Abafan Bes’thende baya eGoli imimoya iphezulu emva kokubetha iSuperSport United ngamagowuli amabini kwelinye kwiveki ephelileyo.
UKopo wakha iChippa United eza kwenza iziqwenga kwiBetway Premiership