Isitshovutshovu seKaizer Chiefs, uKhama Billiat, sithi sizimisele ukwenza umahluko emdlalweni obalulekileyo weCAF Champions League ngempelaveki. UBilliat unethuba elide engasayidlali ibhola ekhatywayo ngenxa yokonzakala – kodwa ngoku ungumqabaqaba okwegqabi leviniga. Amakhosi aza kulwa kubemdaka iisali xa edibana ne-Al Ahly emdlalweni wokugqibela weCAF Champions League oza kubanjelwa eKing Mohamed V Stadium kwidolophi yaseCasablanca, eMorocco.
Eyona nto eyenza umdla kakhulu kukuba iChiefs iza kudibana ne-Al Ahly eqeqeshwa nguPitso Mosimane waseMzantsi Afrika ongafuniyo ukuhlazwa liqela lelizwe lakhe.
Abadlali ababini, uBilliat noLeonardo Castro bayiphumelela indebe yeChampions League besadlalela iMamelodi Sundowns ngo-2016 phantsi koMosimane abaza kujamelana naye ngoMgqibelo. Nangona kungecaci nokuba uBilliat angadlaliswa na – kodwa yena uthi ukulungele ukusebenzisa amava wakhe enze umahluko emdlalweni ojongwe ngamahlo abomvu.
“Ndiyazi kakuhle indlela ekunzima ngayo ukudlala kwiChampions League futhi ndiyayazi nendlela ekumanandi ngayo ekugqibeleni,” utshilo uBilliat, oncome umsebenzi omhle owenziwe ngooxa bakhe. “Abadlali benze umsebenzi omhle kakuhle ukuze iqela lifike kwindawo elikuyo. Ndiziva ndisikelelekile ukuba yinxalenye yalo. Kufuneka sisebenza ngokuzimisela ngoba akudlalelwa indebe yalapha eMzantsi Afrika. Siza kudibana noompondozihlanjiwe be-Afrika kweyona ndebe enkulu. Ndibaqhwabela izandla bonke abadlali abasebenze kwade kwasekugqibeleni.
“Ndinethemba lokwenzeka kwembali ndikweli qela. Sinemizuzu engamashumi alithoba sifike kweyona ndebe inkulu kwizwekazi le-Afrika. Sizimisele ukwenza esikuxelelwa ngumqeqeshi wethu emdlalweni,” utshilo uBilliat. Kunokwenzeka uStuart Baxter abekhona encediswa ngu-Arthur Zwane noDillon Sheppard abangena endaweni kuGavin Hunt – owagxothwa phambi kokuphela kwesizini ngenxa yokungaqhubi kakuhle kweqela kwiDStv Premiership.
Libanjelwe isatifikethi sikaGrade 12 somgunyathi iGosa lezeMpilo