Emva kwemidlalo nje emithathu edlalwe ngamaqela ebhola ekhatywayo kwi-Absa Premier Soccer League – kodwa sekukho iqela eligxothe umqeqeshi. Iindaba ezijikeleza kumajelo eendaba ngale tsasa zithi umqeqeshi weFree State Stars, uDenis Lavagne, ugxothiwe emva kwesiqalo esingancumisiyo kwisizini ka’2016/17.

Lo mqeqeshi waseFrance kuthiwe makaxwaye iitasana zakhe ahambe emva kokuba iFree State Stars iphulukene nemidlalo emibini qha, yaze yadlala ntanganye komnye kwimidlalo emithathu yeli qela kule sizini. Ea Lla Koto ibethwe yiGolden Arrows ngo’1-0 izolo ebusuku eGoble Park Stadium.

Kungoku nje iFree State ihleli kwindawo yeshumi elinesihlanu kuluhlu lwePSL, ilandelwa ngoomafik’izolo – iBaroka FC. Nangona bekukho isiwili-wili sokuthengiswa kweli qela phambi kokuqala kwesizini okukhokelele ekuhambeni kwabadlali balo – kodwa kubonakala ngathi ziziphumo ezibangele agxothwe uLavagne.