UKhuliso Mudau unxanelwe indebe enkulu azimisele ukubulela ngayo abazali bakhe abamxhasileyo kwikhondo lakhe lokudlala ibhola ekhatywayo ukusukela ebuncinaneni bakhe. Oku ukuthethe phambi komdlalo omkhulu weAfrican Fooball League ophakathi kweMamelodi Sundowns neWydad Athletic Club obekelwe intsimbi yesithathu emalanga ngeCawe, eLoftus Stadium. Ukusukela oko ethe wangumdlali weSundowns, umdlalo kaMudau ukhule ngendlela emangalisayo futhi ngoku uphakathi kwabadlali ekuthenjelwe kubo nguRulani Mokwena nanguHugo Broos kwiqela lesizwe.
Ngokudlalela iqela elikhulu elifana neSundowns – oko kukuzalekiswa komnqweno kaMudau owayephupha ngokuba ngumdlali webhola ekhatywayo kwinqanaba eliphezulu. “Bendingeke ndifike kwindawo endikuyo ebomini bam ngaphandle kwenkxaso endiyinikwe ngabazali futhi basandixhasa nangoku. Ndifuna ukuphumelela indebe enkulu, ndifuna ukubavisa kamnandi. Nditshilo kubo – kodwa khange bafune ukuyikholelwa into endithethe kubo,” utshilo uMudau phambi komdlalo obalulekileyo.
UMudau noogxa bakhe banomsebenzi onzima emva kokuba iWydad iphumelele ngo’2-1 emdlalweni wokuqala weAfrican Football League obuseMorocco. Ingakwazi ukuqabela iSundowns xa idlalela ekhaya ngoba ikwazile ukubetha iqela elifana neAl Ahly kwiiveki ezidlulileyo ePitoli – kodwa ingxaki enayo kukuba abadlali bayo abaphambili bonzakele. Abadlali abafana noMudau noThemba Zwane kufuneka balwe. “Ndifuna ukufotwa nabazali ndiphethe imbasa yegolide emva kokuphumelela itumente enkulu kwizwekazi le’Afrika.
“Ewe, bekukubi kuthi ukubethwa emdlalweni wokuqala – kodwa sixoliswe kukufumana igowuli kuwo. Liza kusinceda emdlalweni wesibini. Kungakubi xa singavuma ihambe indebe seyilapha eMzantsi Afrika. Abalandeli bethu ngeke basixolele. Eli lithuba lethu lokuphumelele indebe emva kokuphoswa yiMTN8 neCarling Knockout Cup. Kunyanzelekile siyiphumelele. Umqeqeshi wethu uthe iimbasa siza kuzinikwa nguMongameli weCAF uPatrice Motsepe.
“Khawufan’ ucinga uMongameli weSundowns nomsunguli weAfrican Football League enika iimbasa zeentshatsheli iWydad,” utshilo uMudau, ocele abalandeli beSundowns ukuba bagcwalise iLoftus Stadium ngeCawe ngofanayo nento ebiyenziwe ngabeWydad emdlalweni obuseStade Mohamed V kwimpelaveki egqithileyo. UMudau uthi ubukho babo buza kubakhuthaza kwiinzame zabo zokuphumelela eyona ndebe yeCAF enemali eninzi. Ukuze iphumelele iSundowns, kufuneka ifumane igowuli kungabikho nto eyifumanayo iWydad.
Abafundi bematriki ka2024 benze imbali!