UKapteni weKaizer Chiefs, u-Itumeleng Khune, uyamkele ngokusesikweni ifolosi efikayo, watsho encoma ezinto eyahluke ngazo kwabanye abadlali. Amakhosi abhengeze uGustavo ‘Tavo’ Paez ngokusesikweni kumajelo eendaba namhlanje eNaturena.

Lo mdlali, onamashumi amabini anesithandathu eminyaka, ufike kwiiGlamour-Boys ekuqaleni kwenyanga ephelileyo. Uye waphantsi kweliso elibukhali lomqeqeshi weChiefs, uSteve Komphela.

Ngomhla wokugqibela wokuthengwa kwabadlali kwiPSL, Amakhosi abhengeze uGustavo Paez njengomdlali (wawo) okuphela kwakhe amtyikityileyo.

Indlela elidlale ngayo iqela likaKomphela kwisigaba sokuqala sesizini ka’2016/17 ayibonwabisanga abanye abalandeli kuba bebelindele lukhulu. Unyaka ophelileyo uphele iChiefs ingekude kuyaphi kumaqela aphambili kwiPSL.

Ngenxa yokungabikho komdlali ofaka amagowuli ngendlela encumisayo, abalandeli beKaizer Chiefs nabebhola ngokubanzi, bebelindele iChiefs ithenge umdlali onembali ecacileyo kwicala lokufaka amagowuli.

UPaez unebathwana lamagowuli alishumi elinesithoba emva kwemidlalo elikhulu, amashumi amane anesithathu ayidlalileyo. Kodwa nangona kunjalo, uKhune uyayincoma le folosi yaseVenezuela.

“UGustavo ngumdlali ongemi endaweni enye xa edlala, uyakhawuleza – kwaye ufake amagowuli kwimidlalo yobuhlobo esiyidlalileyo. Ikhona into azanayo,” utshilo uKhune kwiintatheli.

UKomphela unalo ithemba – kodwa uthi abantu bamamnike ithuba lo mdlali. “UGustavo akasiso isisombululo sengxaki esinayo yokungafaki amagowuli – kodwa uzakusinceda kwicala lokugqibezela iibhola. Ndiyathemba uyakunikwa ithuba lokuzinza eqeleni ngaphandle kokufakwa phantsi koxinizelelo,” utshilo uKomphela.

Le ndedeba ifika kweli qela lizama ukubuyisa isidima salo emva kokubuya nemband’esikhova kwisizini ephelileyo. “Ndiyibukele imidlalo yeChiefs kumabonakude. Eli liqela elikhulu phakathi kwamanye e-Afrika. Kumnandi ukufumana ithuba lokudlalela iChiefs, ndizimisele ukwenza elam igalelo,” utshilo uPaez.

Amakhosi amkele uCalmadine Abraw obekade engadlali ngenxa yokonzakala. Kantsi uSiphelele Mthembu no-Edward Manqele bazakukhululwa yiKaizer Chiefs.