NgoLwesibini umhla wesithathu kule nyanga yoMqungu, iPremier Soccer League, ivule ngokusesikweni ithuba lokuthengiswa kwabadlali eMzantsi Afrika.
Nangona amaqela amaninzi ethenge abadlali ekuqaleni kwesizini – kodwa aye alisebenzise neli ithuba xa afuna ukuqinisa iindawo ezithile. Zibakhona iindaba ezothusayo xa kusondela umhla wokugqibela.
Kulindeleke kubekho intshukumo phantse kuwo onke amaqela amakhulu. Iqela laseFrance, iMontpellier, lifuna uKeagan Dolly ngemali eqikelelwa kwishumi elinesine lezigididi zerandi (R14-m).
Kunyaka ophelileyo i-Olympiacos yaseGreece yabonakalisa umdla kuDolly, kangangokuba nemali elimfuna ngayo ininzi. Ngenxa yokufunwa kwalo mdlali, iMamelodi Sundowns, yacela ukuqwalaselwa ngokutsha kwezinto ezithile kwisivumelwano sayo sengqesho noDolly – injongo kukumbamba lo mdlali.
Kusalindwe iziphumo zelo tyala. UDolly, 23, ngomnye wabadlali abancede iSundowns ukuze iphumelele iindebe kunyaka uphelileyo – eyePSL neyeCaf Champions League – eyiphumelele okokuqala kwimbali yayo ekubhokoxeni konyaka ophelileyo.
Kodwa lo mdlali uphinde wazibalula xeshikweni ekhokele iqela lesizwe, Amaglug-glug, kwimidlalo ye-Olympiki ebibanjelwe eRio de Janeiro, eBrazil, kunyaka ophelileyo.
Omnye umdlali ofunwa phesheya nguKhama Billiat. Lo mdlali uziqaqambise kakhulu kwisizini yePSL ka’2015/16 waze emva koko wadlala indima ebalulekileyo kwimpumelelo yeSundowns kwiCaf Champions League.
Kulindeleke ancede ilizwe lakhe, iZimbabwe, ezakuthath’inxaxheba kwi-2017 Africa Cup of Nations kwiveki ezayo eGabon. Uzakusebenzisa le tumente inkulu e-Afrika njengeqonga lokutsala umdla wamaqela aphesheya kolwandle. Akubonakali ngathi ingabakhulula lula iSundowns aba badlali.
IKaizer Chiefs ikhangele ifolosi ngokomlomo kaSteve Komphela kutsha nje. Yona iSuperSport United ifuna ukuqinisa iindawo ezithile.
Nakwi-Orlando Pirates kulindeleke iinguqu kwicala labadlali kuqeshwe nomqeqeshi ozakungena endaweni kaMuhsin Ertugral onikezele ekuthambekeni kuka’2016.
Liyoyikisa izinga lokunyamalala kwamadoda eGqeberha!